قصيدة ✍🏻 بعنوان : عٍشرة عمر

 قصيدة ✍🏻 عٍشرة عمر


مش قادر اقولك الدنيا وحشة من غيرك قد ايه

داقت ف وشي وعليا سرقني العمر ما حستش بيه

كل حلو طعمه مر 

المفيد من غيرك يضر . 

السنين فضلت تمر 

عدا وقت طول عليا كنت محتاجلك معايا فيه


 بس اطمني ... عايزنك تنامي مرتاحة العيال بخير

الصغيرة بقت عروسة وعملنالها فرح كبير

بالظبط زي ما كنتي عايزة يا غالية تشوفيه

بوفيه كبير. زغريط ونور كتير . وعشان الحسد رشينا ملح . بس بردوا ف عز الفرح حسينا جرح 

كان نفسي اليوم دا تكوني معانا و تحضريه


و الكبير جتله بنت احلى حاجة فيها اسمك

كل حاجة حلوة اشوفها لازم يبقى فيها منك

اي حاجة فيها بركة بشم فيها ياغالية ريحتك


بالخير تملي محوطاني سيرتك

انا لو تعبت تشيلني جرتك

والاقي كل الناس زاروني . يهتموا بيا ويراعوني

دا انا لو زعلت بيواسوني و يقولوا كانت وصية منك



حتى ف غيابك واخدة بالك ياغالية مني

مهما شفت راحة بعدك ف شيئ ناقصني

مش ناقصني غير وجودك

انا واحشني جمال حضورك

وحشاني قوي كلمة يابا اسمعها منك

ونفسي بيتنا يرجع ينور تناني بنورك


كل حاجة محطوطة ف مكانها 

البيت ف كل حاجة حبتيها

ناقصني بس تكوني معايا ناكل لقمة و تقاصمني فيها

حتى كباية الشاي لسة مرة ناقصها ايدك تحليها


اخر ايامنا سوا واخركلمنا عمري مهنساهم

وانتي بتوصيني ع اولادنا وبتقولي عيزاهم

يكونوا زيك ف كل حاجة

كنت ليكي كل حاجة

وانا عمري ما شفت غيرك 

كنتي اول عشق قلبي والنهاية

مستحملتش واحدة بعدك تكمل معايا

قفلت قلبي يوم ما قفلوا عليكي قبر

عيطت يومها عياط بديني وحسيت بقهر

وداع ياروحي يا حب سنين وعشرة عمر

وسع يارب قبرها . هون عليا بعدها وا رزقني صبر


كل ما الاقيني حنتلك واشتقتلك

اقرالك الفاتحة وامسك مصحفك

كلام ربنا يصبرني ورحتك فيه ترجعني

لايام تعبت فيها واحتاجتلك


وافتكرك وانتي بتقولي حاسة بيك اتكلم واحكيلي 

اسيبك تصلي وادخل الاقيكي ف كل ساجدة بتدعيلي 

تطولي ف السجود وبأهدي صوت

اسمعك بتقولي يارب ارزقه برزقنا

كنتي جميلة صافية دافية و حنينة

عمري ما حسيت بمحنة وانتي هنا

من يوم فراقك وحالي مايعلم بيه الاربنا


قصيدة ✍🏻 عٍشرة عمر

تأليف وإلقاء : رامي عبده قاسم علي


تعليقات