محبتش تاني ليه
تأليف وإلقاء : رامي عبده قاسم على
ماحبتش تاني ليه . دا السؤال اللي دايما بتسأله
وما عنديش اجابة عليه
لان الاجابه واضحة وباينة ف ملامحي
كل تكشيرة ف وشي كان سببها جرحي
حتى لو فكرت اغير من نفسي وامحي
العذاب هنسى ازاي ان حبيبي طلع كداب
وان حلم سنين لقيته سراب . وانه اخد الحلو كله وفاتلي خراب
كداب . حلفلي . صدقته . امنته . فاتلي . عذاب
كان لازم اقفل باب العشق . بالنسبالي انتهى الموضوع
كان فادني بأيه الصدق غير اني بقيت موجوع
وانا مش بتاع اني احب واعشق واقول بالكدب
انا حبي بحق الله وعندي الحرام ممنوع
فامقدرتش اوعد قلب باني هقدر اكونله
وانا مبيت نية غدر في قلبي مركونله
وكمني جربت الجرح ودقت اذاه ومره
ولاني مش قد دعوة المظلوم .
رافض اجرب لأذي حد فيوم
كاتم جوة مني وساكت . لحد ما مشاعري ماتت
وعزاها باخده كل يوم
ولو في يوم هب عليا نسيم الحب
هبقى اتفرج على فيلم اشاعة حب
واضحك ............... فعلا من قلبي بجد هضحك
وانا سامع سمير بيقول عادل ما انا ياما نصحتك
في كلام كدا مابين السطور مابنفهموش
وانا ياما عقلي قال لقلبي ما اتأمنلهوش
بس العند بيولد الكفر . فيسبب قهر
ويقصر عمر . عشان سلمت قلبي في يوم
كان لازم ادوق المر .
عشان ارجع احب تاني ويبقى عند اصلا مقدرة
محتاج ازرع قلب جديد وامسح من عقلي الذاكرة
محتاج اصدق ان لسة اصلا في قلوب عايزة تحب وتتحب
كفاية كدب سمو العلاقة اي حاجة غير حب
يا اللي ظلمتو الحب الحب ماتظلمهوش
الحب بريء منكوا يا ابلسة لابسة وشوش
كلمة حب فيكوا خيارة ......... و منكم ذنب
صفحة مقلبتهاش لأ ..انا قطعتها
كل مبادئ الحب خلاص قاطعتها
حلفت اعيش زي الناس اكل واشرب وبس
معايا حقه هشتريه معيش اتفرج عليه وبس
خلاص كدا جبرت . كبرت ف دماغي وقفلت
انا مش هحب . غير نفسي . و هديها حقها
هنضف قلبي من بصمات ناتجة عن علاقات ساذجة و قديمة
هعمل لقلبي سعر وقيمة .
مش كل من هب ودب
وهفه الشوق يدوق الحب
يجي عندي يجربه فيا . خلاصي قلبي ما عدش هفية
لحالي احلى . كفاية وحلى . وناس جت بخسارة عليا
معدتش اهبل . واكيد مش هقبل . حد تاني يجرب فيا
قصيدة
: محبتش تاني ليه
تأليف وإلقاء : رامي عبده قاسم على

تعليقات
إرسال تعليق