قصيدة ✍🏻 قَرأَتْ كَفْي
قرأت كفي
روتيني اليومي المعتاد . انام بمعاد واصحى ف معاد من بيتي لشغلي لبيتي . بعد يوم شغل طويل واجهاد
بحاول انساكي يا اللي انتي نسيتي . وبعود نفسي بنفسي ع البعاد
ارجع والجسم كله مهمد . لكن روحي قايدة نشاط
ومهما حاولت متعود . ف نفس الوقت الشريط يتعاد
تلفوني يرن . انت وصلت . طب اتغديت . طب روح على ما اخلص شوية شغل ف البيت . وتسيبلي كلام متأجل
فضلت متحمل . ليالي اصحالك . مستني اسمع رنة كنت مخصصهالك . ف حضن الليل نمتي ولا ف بالك .
واحد فيتاه يتوه ف مساه عشان سيباه . مع وحدته يكمل .
فاكر كل حرف و كل كلمة ف كل حوار
تخدني الذكرى من ايدي لعندك . ودب ميت مشوار
ولا مشاور منهم وصل بيا . ولا النسيان اخدته قرار
وف عز ما انا مخنوق ومدايق . يرن تلفوني المرادي بجد
اتأخرت كدا ليه يارايق الكل موجود و مش ناقص حد .
معلش سامحوني بس مش قادر . هنزعل لو مجتش بجد .
البس وانزل وانا حاسس . ف رجلي ميت قالب
وان كان ع طاقتي فكلها بالسالب . اخدتي يا دنيا مني حبيب . ف يريت ما تخديش كمان صاحب
قاعد وسط صحابي . وحاسين اني مش معاهم
روحي هايمة بتدور عليكي انتي . وسيباهم
مشغول بيكي انتي عنهم . وعليا انتي قلقاهم
شوية وسمعنا صوت . وكله ف وقت واحد لف
ابين زين ابين اشوف الودع وبقرا الكف .
قالوا وماله . نجرب ونشوف
وابتدت فورا تقرا الكفوف
وكل ما يقرب دوري احس بخوف
كفي بيعرق و قلبي يدق دق دفوف
وفجأة قالتلي اديني كفك يواد . بلاها كسوف . خليني ابوص واشوف
سايستني .شافت ف عيني الخوف وحستني . اطمنتلها فلقتني . رميت بين رحا اديها كفي
اطراف صوابعي ف اديها
خطوط كفي شايفها واضحة ف عنيها
وفجأة من ايدها وقع كفي . وقالت خلاااص بيكفي
حرام عليك ليه ف روحك كدا بتعمل
وماله يا امي عشقت ولازم اتحمل
يابني دي مش اخر الدنيا. واللي خلقها خلق غيرها كتير
عارف بس هى اولها واخرها . واللي فيتاه يا امي كبير
هزت راسها وقامت مشيت . ملتفتتش
مسكينة حاولت تطيب جرح . وماعرفتش
قصيدة ✍🏻 قرأت كفي
تأليف : رامي عبده قاسم على
تعليقات
إرسال تعليق