أخيرا إتصلت
تأليف وإلقاء : رامي عبده قاسم علي
اخيرا رجعت اتصلت . ومعنى انها اتصلت
يبقى حكمتي انتصرت
قالتلي طلع كلامك صدق
حسيت بعدك اكيد بالفرق
كل اللي قولته صح
حسيت بعدك بيتم و جرح
في بعدك خاصمني الفرح
وعرفت ان الله حق
فرحان ومن شدة فرحتي ما بقتش الدنيا سيعاني
رجوعها ليا او عدمه دي حاجة ما كنتش شغلاني
بالنسبالي ماتت واللي مات عمره ما يصحى تاني
انا فرحان عشان طلعت صح وكلامي كله صحيح .
ف نفسي شككتني لكن رجعت كلمتني وقالتلي كلام مريح
قالتلي سامحني بجد انا اسفة
وعارفة ان اسفي ملوش لازمة
وانك خلاص نستني . ومن قلبك رمتني
وتيت تيت تيت لأخر الشريط
كانت فكراني اهبل بريالة مغفل ساذج وعبيط
اول ما اسمع انها رجعت هفرح واتشقلب ع الحيط
كانت فاكرة.. انها قادرة .. بسهولة ترجع على طول
هجري افتحلها . باب قلبي واقلها . هو احنا نطول
متعرفش اني قلبي اتملى منها
كانه ورقة مليانة بشخابيط
ما بقاش باين منها ولاسطر
بقت ف حكايتي آخر سطر
يعني قفلة لحدوتة و نهاية
واي نهاية بالنسبالي سعيدة
ما دام مش فيها معايا
رجعة بكل برود . داخلة فطريق مسدود
ماشية على نار الندم حافية
بدموع كدب ونية مش صافية
صوتها حزين مكبوت . تحسة ناي مع عود
عوزاني اسامح وانسى . وتاني ليها اعود
طب هتقدر تنسى طبعها اكيد ما ظنش
طول عمرها عايش لنفسها وغيرها ما يهمش
قولولها تبطل زن . والله لو سخرت جن
ياما حاولت احن على قلبي ما قدرتش
انا منها مش زعلان كل الحكاية وما فيها اني ندمان
حبيتها حب لو اتوزع ع الدنيا كان كفا ورجعلي نصه
بس ياخساره ضاع ع عقل وقلب لا بفهموا ولا بيحسوا
طول عمرها وهي نافشة الريش
جالها يوم ونزلت على ما فيش
شكلها مش حلو وهي بتتحايل
و بعد ما كان قلبي ليها بالكامل
ما بقتش طايق اشوفها و ماتلزمنيش
مافيش . مافيش حاجة ليها جوايا زي الاول
بقيت بتدايق كل ما وجودها قدامي يطول
غلاها جوايا قل . ومنها قلبي مل
فراقها دلوقتي بقا هو اسلم حل
قصيدة : أخيرا إتصلت
تأليف وإلقاء : رامي عبده قاسم علي
تعليقات
إرسال تعليق