قصيدة ✍🏻 أنا ما أستاهلكيش
انا ما استاهلكيش
انا مااستاهلكيش.. عندك حق
انا فعلا ما استاهلكيش
انا معملتش حاجة وحشة ف حياتي
لدرجة اني اتظلم بيكي
ومعاكي اعيش
طب قولي مين يستاهل . ولا هو الكلام بالساهل
ولا يمكن عشان كنت معاكي با تساهل
ف انتي مقدرتيش
محستيش قد ايه تعبت وانا بحاول ارضيكي
مقدرش تراب شقى رجلي عليكي يملى عنيكي
دا انا عشان وحدك ما افتكيش
نسيت اسأل ع ناس ماتتنسيش
نسيت معاد دوى امي نسيت اروح اوصل اختي
سمعت ان اخويا بيتخانق و مهمنيش
كل دا ع الفاضي . كل دا ع مفيش
كنت ليكي حب وعشق وامان ووجود . فكريني بيوم نمتيه وف شيئ كان نفسك فيه مش موجود
فكرني بمرة كدبت ولا نكرت ولا خلفت معاكي وعود
ف شيئ مش مظبوط . ف جزي ف الحكاية مش موجود
هو انا كنت ف حياتك ايه كنت ف حياتك نيش
لميتي كل اللي عجبك فيه ركنتيه ومهمكيش
هو انتي كنتي دعوة عليا و لا انا اللي كنت دعوة بالغلط ليكي
تشوفي يابنتي الخير كله ف صابت فيا ولسوء حظي اتبليت بيكي
واكمني انضف من ضميرك
كان لازم اعرف ايه مصيرك
جوة قلب كتير عليكي
دلوقتي كل ما اشوفك معدية
بشوف حاجات فيكي تنتمي ليا
حاجات علمتهالك . حاجات ف لبسك جبتهالك . حاجات من غير ما تحسي جوة منك سبتهالك
كفاية وانتي ماشية . لسة بيندهوكي بيا
كل الناس شفوكي ليا ..... الا انتي
اسكترتي نفسك عليا وكبرتي . وقلتي اني ما استاهلكيش
امانة وانتي مستنية اللي يستاهلك . متتسرعيش
واحدة واحدة وتاتة تاتة قابلي واحد واتنين وتلاتة
بس اوعي تتفاجئى لما ساعتها متلاقيش
حد ربعي . حد طبعه زي طبعي حد راجل
حب صعب يصدفه قلبك مرة تانية مهما قابل
وساعتها لو جيت ع بالك
والنبي ما تطوليش
لاني انضف من وجودي ف خيال واحدة زيك
ما تستاهلنيش
قصيدة ✍🏻 أنا ما أستاهلكيش
تأليف : رامي عبده قاسم علي
والقاء شعر : رامي عبده قاسم على
تعليقات
إرسال تعليق