قصيدة ✍🏻 الحب إشاعة

 قصيدة ✍🏻 الحب إشاعة


الحب وهم والنصيب شماعة 

متعلق عليها قصص عشاق اخرتها فراق 

بكل برود وجحود وبشاعة


دي موضة الساعة . بكل بساطة الحب اشاعة


ياما ناس حلفوا ايمانات . برحمة الحي واللي مَات

والرحمة تجوز ع الكل . ف ناس ف حياتنا كانوا حياة

وناس غاوية تكون ف حياة الكل 


كلمة بحبك بقت سلاح ف ايد اي غشيم

مدخل سهل لكل شيطان ملعون و رجيم

يفوت بيها بالراحة. ويبقالوا ف حياتنا مساحة

وبعد مانحس بالراحة يفوتها جحيم


حد لئيم اللي يفوت ع قلب ويقوله افتحلي

انا واقف ع بابك متخفش مني وارتاحلي

ويتمكن بعد ما تمسكن . وفجأة ومن غير ما يستأذن

يقول البعد اريحلي


بقيت اضحك لو سمعت حد بيقول

واخيرا لقيت نصي التاني

طب قولي والنبي انهو نص فيهم

الفوقاني ولا التحتاني


كفايا شعارات . كفاية حالات واتس آب وبوستات

كفاية شغل افلام وكلام اغاني

هما نوعين بس من البشر


 حد حب . ف وعد بقلب . وانتظر

وحد لعب . ولما تعب . بيك غدر


هو دا الواقع ودي الحقيقة ومعنديش كلام تاني


قصيدة ✍🏻 الحب إشاعة

تأليف : رامي عبده قاسم علي

تعليقات