وجع الفراق
قصيدة : وجع الفراق
تأليف : رامي عبده قاسم على
وجع الفراق
وجع الفراق لعنة وحلت عالمشتاق
ذكرى بتنهش ليل الوحدة بكل غباء
ومهما يحاول المجروح
يداري الوجع جواه
لمعة عنيه بتبوح
وصمته بيكشف المعاناة
وتنهيدة بطعم الاه
بتفضح ستر المداري
مابين الود والبعد
تحويل مسار اجباري
حبيب يتوه في غريب
وحسرة بتلعن في الأسباب
اصعب ايام الفراق دايما بتكون اولها
فكرة انه اتساب رافض عقله يتخيلها
ومابين وهم بيرحل
ومصير اتفرض عليه
بيسأل نفسه عمل ايه
علشان يتساب
ويبدأ المتساب يراجع الحساب
يطرح أسألته ويجمع الأسباب
يضرب حزنه في اتنين
ويقسم وجعه لنصين
نص وحدة ونص إكتئاب
وتبدأ حيرته وقلة حيلته
تايه مش لاقي جواب على اسألته
مش داخلة دماغة الفكرة
ازاي يجي عليه بكرة
ويشوف ايامه بتتحول قدامه لذكرى
مجرد تفكيره ازاي هيكمل من غيره
دا لوحده عذاب
ويرجع يقلب في دفاتره المقفولة
على لسانه مفيش غير كلمة معقولة
جه اليوم اللي يخبط على بابهم
بعد ماكن بيروح عادي وبيجولوا
حقيقة وبانت للمرة الاولى
عمال بعيد الفلم من الاول
وكل مايرجع المشهد يتحول
من هجر وبكى لود ولقى
وحبيب وعده انه هيبقى
ونهاية الفلم يفوق يلقى
دور المخدوع لعبه بطولة
ويكمل ايامه الجاية
في نسيان الغلطة اللي عملها
بيصالح نفسه على الدنيا
مش عاجبه الحالة اللي وصلها
لسة بيتكعبل في خيوط الماضي
متشعبط في امبارح وعنيه على الاتي
وكل ما يندم يبدأ يفهم
ويشوف الدنيا على أصولها
إن الوقت بيسلم ديق الوحدة
لمخرج النسيان
و إن هم فراقهم مسيره بغيرهم
فرجه يبان
ولانه طبيعي كان وارد جدا يغلط
ويحس كمان انه مشوش او متلخبط
وانه في الأول والآخر مجرد إنسان
الفراق ناتج لعلاقة وفشلت بين اتنين
والحب دايرة ثقة
والدايرة ماتكملش بضلعين
يلزمها دراعين
محاوطين جنين الحب وعليه خايفين
الفراق غدر ماسك في ديل الإهمال
ومداري في توب لونه حنين
الفراق خيانة وعد
بيت اتهد و حطانه ماله
جري المتساب ع السايب يسأله ماله
واجه بخيانته وحاسبه قام دانه
حب اللي خانه يسد
ماله ما وفاش الدين
وقت الفراق ما تفرقش مين ساب مين
هما اتنين دخلوا رهان وطلعوا خسرانين
ومدام واحد فارق ومش فارق معاه
الخايب هو اللي هيمشي وراه
ويسأل راح فين
لكن الواعي بس
هو اللي يمشي العكس
ويغير الاتجاه
وااااااه عاللي فارق
لو كان يعلم الغيب
او يعرف معنى العيب
ما كنش ندم عمره هيكفي
ولو قدم سنينه مش هتوفي
حق الذنب اللي ارتكبه
وقله قصله وسوء ادبه
في حق ناس غاليين
اكمن نفوسهم حلوة
زرعوا دهبهم في الطين
تأليف: رامي عبده قاسم على
تعليقات
إرسال تعليق