فرصة سعيدة


فرصة سعيدة 

ع حطة ايدك زي ما سبتيني
بصارع ندمي وطالعان عيني
باكل ف نفسي ونفسي بتاكل ف سنيني

مستني اللحظة اللي تحني
وتحت جناحك تخديني 

انا ملكك ورهن اشارة من صابعك
كلمة حاضر ردي الفوري ع امرك
متشعبط أملي ف ديل ظلك
وغلاوة امك رديني 

مش دول الكلمتين اللي غرورك 
بيحارب لجل ما يسمعهم 
دلوقتي هرد عليكي بأسلوبك 
ومشاعري ماعدتش همنعهم 

مضطر و مع بالغ اسفي
اقولهالك بالمعنى الحرفي
صوابعي الخمسة اللي في كفي  
انا بحني لغرورك اوسطهم 

دا اللي يليق بيكي وتستهليه
لكن هقول ايه
البعيدة باردة
شوكة ف وردة
ياما جرحت ايدي
سم بيجري جوة وريدي
فكرتك عيدي طلعتي النكسة
حسبتك نصرة طلعتي الوكسة
رميت طوبتك اتردت ف ازازي
ازاي شوفتك طموحي وانجازي
فكرتك حل لاسألتي
اتاريكي اصعب الغازي 

فعل حرام
سم خام
بيجري جوة وريدي
راجعة بكل بساطة
وبعين قادرة و واسعة
ومشاعر زايفة وخادعة
بتقولي ندمتي ع الغلطة
وريحة كدبك فايحة وطالعة 

براكي بيحاول يستر جواكي
تباني لوحدك بس شيطانك مداري وراكي
راجعة و فرشالي الفرشة
بوعود سامة و غاشة
محترفة كدب عديمة اب وابليس رباكي 

انتي شيفاني ازاي
فكراني ايه 

حمار بلجام ولا فرد حمام مأواه كفوفك
و لااكمني بحبك هرمي كرامتي ع رفوفك 
مش انتي السكة اللي توصل 
ولا انتي الكعبة اللي هطوفك 

محسوبك كرامته عنده  بالدنيا تاج فوق راسك 
ولولا عندي بنات زيك مكنتيش هتنولي خلاصك
لو واحد تاني 
كنتي هتتزلي وتتهاني 
ولو انتي مكاني مكنتش هتسمحي
بس انا سيبتك لانك مش لزماني 

ياخاينة  يا فاكرة اني ضعت ف غيابك 
عندي أخبار وحشة علشانك
بالنسبة لنسيانك دي أسهل مرحلة عدتها
اللي تعبني بجد وأنا بمحي آثار الهد
وبلم كراكيبك حلوك ومرك وسنينك 
وبطول دراعي رمتها 

انتي دور قمار لعبته ف لحظة طيش و خسرته
امتحاني اللي ذاكرته و قفلته وبردو سقطته 
لا ليكي لون ولا ريحة 
فكرتك ماية بتروي طلعتي سبرتو 

كان طبيعي جدا فيكي اتغش
فكرتك صلبة طلعتي خيش وقش
زرعت الشجرة وبنيتلك عش
وف الآخر طرتي و سبتيني 

ولو انتي الحسنة اللي هتشفع
ف ميزان أعمالي وتنجيني 

ولو روحي متعلقة بوجودك
ايدك ابوسها وفارقيني 

انا عندي اموت اكرملي 
من اني اسمحلك واشوفك
للمرة التانية بتشتغليني

فاكرة سنيني
حبيتك بعتيني 
ما بينا كلام يعبي شرايط
اعزف تفاصيلك
وانتي تغنيني 

وجودك ف حياتي كان لحن صوته نشاذ
كدبك تؤم صدقك والفرق ما بينهم اعجاز
كدبك ولع في جنايني
وبدال ما تحوشي النار عني
راجعة تطفيها وايدك غرقانة ف جاز 

طول عمرك وش اذية
طلعتي الوحش المدفون فيا
كرهي وسخطي  وغضبي 
جبتيلي السكر و العصبي
بعد ما كنت برنس الحنية 

لو عليا وعكس قانون الجرح 
كان نفسي اديكي فرصة تانية
مش عشان طيب وسامحتك لااا
عشان اخلص طاري واهدى شوية 

لكن قلبي اكمنه نضيف
وما اتعودش انه يأذي ضعيف
فرصة سعيدة ووقت لطيف
روحي لحالك ليلك حالك
وأنا عايز واحدة تنورني 
واحدة تشوفني نجوم ليلها 
واحدة تقدر تحس و تفكر ف شعور غيرها
مش واحدة بعد ما هدتني
رجعالي وعيزاني ابنيلها
مش واحدة براها مزيف
وجواها اسود من ليلها

.............................
طبيعي ما تعرفنيش
ما انا اتغيرت و اختلف عن زمان شكلي
من تحت راسك بقيت باكل ف نفسي 
لجل ما تتغذي مشاكلي
بهمل ف شكلي وهدومي
كفاية عليا تكشرتي وهمومي
والحزن حاطتني ف عنيه
وشايلني من ع الارض شيل
وقوليلي صحيح ازي حال النهار
ما شوفتوش من يوم ما اخدني منه الليل
ورماني ف دوامتك 


ع حطة ايدك زي ما سبتيني
مستني اللحظة اللي تحني
وتسامحيني
اتأدبت و اتعلمت ان بعدك ورطة
وبأدب نفسي بقسوة  ع الغلطة 

لو ع العمايل ف الكل 
بيعمل بس بأصله
واللي خفت حدوثهم اديهم حصلوا
دابت القشرة وبانت اللبة
ظهرت حقيقتك يا اكبر كدبة
عملتي زي الدبة اللي من خوفها
قتلت صاحبها


تعليقات