فرحة لؤاكي
لقاكي اثبتلي اني من غيرك
كنت برتكب ف حق نفسي اكبر غلطة
وان تحويشة ايامي قبلك
اتصرفت ع الفاضي و ضاعت اونطة
يا مختلفة عن غيرك
ع مقاسي كل الحاجات لايقة عليا وظابطة
فرحتي بلؤاكي فرحة الطير بطيرانه
فرحة عيل التقا امه بعد توهانه
فرحة لاجئ بالرجوع لستر اوطانه
فرحة مش ع البال
واقع بيمحي خيال
تأكيد بينفي محال
ويثبت وجوبه و حدوثه وإمكانه
يامرتبة الملخبط
ومرجعة التايه لاصله ومكانه
في عز الضهر نجومك في سما وحدتي بانوا
يا أحلى من صوابع الست
وهما بعزفوا ع بيانو
هلالك هل
ومعاه الحل
لكل اسألتي
وشكوكي وظنوني
بدون ازاي وامتى وهل
قلبتي كياني و غيرتي مضموني
وزقيتي سكوني خطوتين قدام
وجدتي لأي علة او استفهام
إجابة تطمن بكرة
في ارضي الخايفة كنتي البذرة
اللي طرحت هدوء وأمان واستقرار
بالنسبالي انتي الحضن
مأوة وضلى وستر ودار
بعد طول انتظار
يشاء المولى يكون جزاتي
بعد طول معاناتي هو ظهورك
وان العتمة اللي طالعت ايامي
قبل ما قابلك واشوفك
تفتح وتلمع ف عنيا بنورك
يا دعوة من حدي وكفارة لذنوبي
يا حتة سكر في عروقي بتدوبي
يا خامة نفس اللون و توبها من توبي
مكانك في قلبي ارض اتمهدت بحنان
أساسها المودة والوفا عمدان
وحطانها من طوبي
يا سحر بيحول المستحيل ممكن
انتي الكنز اللي محتاج انه يتأمن
من مكر الدنيا واساليبها
انتي الغزوة اللي حررت روحي من احتلال الخوف
انتي الاستيكة اللي بتمسح من سطور
كلمة ظروف
بصرخ بقول فينك ورغم تأخيرك
الفرحة فيض خيرك
حبيبتي قلقي الزايد
مجرد خوف عليكي
مش تحكم معاذ الله
وأنا مغمض عندي ثقة فيكي
ومش ذنبي ان حسنك مليح
لو بإيدي ابنيلك من ضلوعي مقام
والف حواليكي
طبيعي جدا ع فكرة اكون عليكي قلقان
طب اشهد الخلق عليكي
احضرونا ياجدعان
واحدة بابا وماما
جمعوها قطفة بقطفة
من كذا بستان
كوكتيل ورد ع فل ع ياسمين وريحان
العود تمر حنة والغصن لبان
لو عليا هقفل عليكي بيبان
ونسي الطريق شكلك
هقطع علاقتي بالدنيا
واجل شغلي ومشاغلي وافضى وحل معاكي في مشاكلك
فداكي الغالي والمهم
الصعب لجل عيونك يتم
ينسمة في الهدوء بتلم
وتفرقها حب و سعادة
يا حلوة و مظبوطة بزيادة
يابنبونتي
يابندقتي
ياحبيبتي وصاحبتي وبنتي
الفرح بان يوم بنتي
ودقيتي عليا الباب
يامضاد حيوي الإكتئاب
يا فرحة بدون اسباب
يا نعمة وفضل بعد عذاب
حضورك راضي الأمس
ويظبط يومي
وبيطمن بكرة
بيوضح ويأكد فكرة
ان آخرة صبري
جبران خاطري
بأحلى واجمل من كل اللي اتمنيته
وكأن قلبي التايه عيل رجع بيته
واخد حضن حبايبه في دراعه
نستيه كل صدماته وانكسراته واوجاعه
وأمن للبشر والدنيا بعد احتراف الكره
بأنواعه
غيرتي فيا كتير
غيرتي اسلوبي و تفكيري
عيوبي وتقصيري
وعدلتي ف طباعي ورتبتيني
وبدون ما تحسسيني
لعبتي ف الواقع وغيرتيه
البايظ صلحتيه
والناقص كملتية
غيرتي المشهد كله في عيني وجملتيه
سحرك غلاب
مينفعش معاه
لظروف ولا خوف ولا غياب
انتي السبب والوالاسباب
كله ف ايدك
قوة تأثيرك
من بدري كان فينك
بصرخ بقول فينك ورغم تأخيرك
الفرحة فيض خيرك
بعكس السيناريو المعتاد
جمعني النصيب بيكي
وكان الفرحة واخدة منك ليا معاد
مش محض صدفه
مركب حظي تلمح برك
ويصبح قلبك هو المرسى
وان كنتي حاسة باللي انا حاسه
نتقاسمه
حضورك ملكي
ياكنزي وماسي وقوتي
يا مكسب صعب يتعوض
وفرصة خسارة تفوتي
مفيش كلمة ترادف احساسي
و صفك
مطلوب مني اوصف حسنك
و ٢٨ حرف ميكفوش
تقيلة ف نفسك
مش بالساهل حد يشاغلك
راسية وهادية قادرة
لوحدك تحلي مشاكلك
ملامحك واخدة من طبعك
هدوئك سر تكوينك
لسانك وهو بينطق
وداني في العسل تغرق
شفايفك يدوب تتحرك
عيني معجبة بتتفرج
وعقلي ف الخيال يبدأ
و غمضة عينك وهي بتضحك
بتصحي الأمل فيا
ملامحك واخدة من طبعك
هدوئك سر تكوينك
ومهما اركز ف تفاصيلك
يلف عقلي ويدور بيا
هدوئك خام حنين صافي
جنونك نار يلزمها مطافي
حدفت صوبك خطافي
واذ بيكي انتي اللي صيداني
جمالك رغم كونه بسيط
تاهت عيني في تفاصيلك
ملامحك واخدة من طبعك
برائتك سر تكوينك
وبالقبول ربنا زادك
كأنك فراشة ورحيق القلوب زادك
وزاي كل اللي قابلوكي
قدرتي تخليهم يحسوكي
واحدة
صنعك
سمعك
برائة هدوئك ورزانتك سر تكوينك
كأنهم قبل اللقى كانوا عارفينك
وكمنو ما فيش منه
وما يفرقش القمر عنه
قلبي وعنيا
لو غاب شوية يبتدوا يزنوا
جزاني ربي ع صبري
وكافأني الليل ع سهري
وتمن وجع قلبي ودموعي
اتردولي أضعاف مضاعفة وكاش
واللي فكرت اني خسرته قبلك
حمدت ربي انه ماجاش
وجودك طمني
ف ما عدتش محتاج افكر واحسبها
انتي الفرصة اللي خايف
اخسرها او اسبها
انا من نوع الرجالة
اللي بتفعل مش بس قوالة
انا دايما وف اصعب حالة
جانبك وف ضهرك
كنتي حل وطوق نجاه كنتي الرمح
كنتي بيني وبين الدنيا محضر صلح
كأنك نسمة عليلة
ف ارض كبيرة
مليانة بخضرة ٦ الصبح
اي شيء يخطر ع بالك
لو حتى مش طايله خيالك
تعليقات
إرسال تعليق