فوبيا
قصيدة : فوبيا
تأليف رامي عبده قاسم علي
معنى فوبيا يعني خوف
والخوف نقص حاد في الأمان
ومش معنى انك تحس خوف
إنك ضعيف او جبان
الخوف عرض مش مرض
مش خلل في عقلك او جنان
كلها بتخاف
واللي يقولك ما بخافش
بني آدم زيك مش شفاف
الكل عنده اللي يخاف منه أو عليه
في اللي خوفه باين في عنيه
وفي اللي قادر يداريه
ومش متشاف
لكن بيخاف ووقت الخوف
هتسمع دقات قلبه بقوة ١٠٠ اوكتاف
وانا عندي فوبيا من كل حاجة
خوف غريب لدرجة سذاجة
أتمكن مني واتحول لعادة
عندي فوبيا من السعادة
بتفوت بسرعة وملهاش إعادة
تملي حظي مسلوب الإرادة
وراحتي دعوة بدون إستجابة
عندي فوبيا من الكتابة
بتدخلني في مود كئابة
انا وقلمي اتنين غلابة
بنواسي بعض ع الورق
عندي فوبيا من الزهق
مفيش جديد بعده فرق
نفس الروتين بجري في سبق
يومي يخلص واعيده تاني
عندي فوبيا من الأغاني
بتوصف مشاعري وأرجع اعاني
لحن الفراق معزوف عشاني
وكإن وجعي ملوش نهاية
عندي فوبيا من القراية
بخاف اقابله جوة الحكاية
وافتكره كان ازاي معايا
زي ضلي ليل نهار
عندي فوبيا من الانتظار
بعد حب سنين كتار
هان عليه ياخد قرار
بإنسحابه من حياتي
عندي فوبيا من ذكرياتي
ساب علامة X في حياتي
لعب البطولة في كل رواياتي
وفجأة بطل وأعتزل
عندي فوبيا من الأمل
هنسى ازاي اللي اتعمل
ونفسي افهم ايه حصل
خلى حلمي في حضن غيري
عندي فوبيا من مصيري
صراع مابين ندمي وضميري
سكوتي طمع فيا غيري
يئذوا فيا وقول تمام
عندي فوبيا من الغرام
قلبي تاب و بطل حرام
ما بقتش بدي اي اهتمام
لأي علاقة من اي نوع
عندي فوبيا من الرجوع
حنيني ليه نوع من الخضوع
لقانا رغبة في الممنوع
الود بينا وصله انقطع
عندي فوبيا من الوجع
ياقلبي انساه و خليك جدع
وقته انتهى و بقى مرتجع
عليا بخسارة حبه اتحسب
عندي فوبيا من الغضب
هفضل فاكرله انه السبب
قلبي القوي بسببه اتغلب
كان حلم و تحول لرعب
عندي فوبيا ارجع احب
واخدها جد تقلب بلعب
ابدرها حب تطرحلي كدب
واسعى لخسارة مش قدها
عندي فوبيا من وقتها
الحب في حياتي دوره انتهى
دنيا الغرام اعتزلتها
وخلاص معايا قلبت بعند
عندي فوبيا عشان بجد
قلبي مرة حب حد
خانه ونساه الأمان
تسموها فوبيا او جنان
هفضل لوحدي مهما كان
معنى فوبيا يعني خوف
وقالوا زمان من خاف سلم
هعيش لحالي ونفسي احترم
اكرملي ابقى وحدي و غريب
احسن ما اتعلق ب ناس تسيب
وعافر في دنيا على كيفها ماشية
وانا اللي أضعف من النصيب
تعليقات
إرسال تعليق