ياعم الشيخ
ربى دقنه لحد ما بقت عند الكرش وصلاله
لبس على راسه العمة و جلباب اقصر من سرواله
اتبخر واتعطر بمسك وعنبر
مسك السواك سنة والسبحة في ايده لونها اخضر
حفظ من كل سورة كام آية بالعدد
على كام حديث من السنة معظمهم بدون سند
شاف كام فيديو لكام شيخ من على اليوتيوب
صبح شايف الناس كلها عاصية ومليانة ذنوب
وطاح في كل الخلق يحلل ويحرم
وبدون وجه حق يبيح ويجرم
والناس تسمع وتقول مدد يا مولانا مدد
وأسأل دا يطلع مين ومين دول اللي لحقينه
يقولوا دا سيدنا الشيخ ودول اتباعه ومريدينه
داير يقول قال الله وقال الرسول
مجرد كلام منقول
على لسانه من كتاب مجهول
كتبه شخص جهول
الدين بالنسباله عنف و تعصب
بيصرخ في الناس والاسم بيخطب
اسلوبه فظ يخوف
من جواه فاضي واجوف
عمال يهول ويوصف عذاب النار
وكأنه قاعد وسط ناس كفار
قاعد يفتي تقولشي مفتي الديار
واحد على الله ورسوله والتابعين
بيدعي ويفتري
لهو اهل علم ولا من رجال الدين
ولا حتى ازهري
شيخ من بتوع التوك شو
دين ربنا على مزاجهم بيفصلوه
اي كلام على هواهم بيقولوه
الحلال بيحرموه ... والحرام بيحللوه
وكأن الدين حجر عليهم
فرض وواجب نسمع ليهم
ولو حد عارضهم يكفروه
كلام ربنا مفسر نفسه
ولو بعضه محتاج تفسير
يبقى من اولي العلم
حد فاهم ودارس كتير
مش كل من قرأله كتابين
يصنف نفسه قوام راجل دين
الناس مش ناقصين
هما لوحدهم تايهين
الناس لسة تايهة في سنة العصر
الدين طول عمره يسر مش عسر
كلمهم في ايه جايز وايه مفروض
كلمهم عن قيام الليل و النوافل والفروض
كلمهم عن الصلاة والزكاة والصوم والحج
خاطب الناس على قدر عقولها ياعم الحج
ومش عيب تقول على أمر ما إني اجهله
ياعم الشيخ الدال على الخير بالظبط كفاعله
لو جالك حد في فتوة ما
دله يصلي ركعتين في الأزهر لله
هناك هيلاقي اهل التقوى والصلاح والعلم
ياعم الشيخ الفتوة عن جهل تعتبر إثم
بدل ما تكلمهم عن فتوى ارضاع الكبير
وحكم فطام الصغير
وادق تفاصيل السرير
وحق الزوج على زوجته
كلمهم في الواجب معرفته
كلمهم عن المصطفى وسيرته
كلمهم في الصح والمفيد
بلاش تكون جاهل وعنيد
واعترف ان الخطاب الديني محتاج للتجديد
اتقي الله فينا يا مولانا
سيبك م الفرغة و ركز ف المليانة
سيب الناس لخالقها
عمر الستر ما كان بالتوب
في ناس عريانة لكن مستورة
وناس مستورة بتعريها ذنوب
بتفضحها
تعليقات
إرسال تعليق