بحبك وبموت فيكي

قصيدة بحبك وبموت فيكي


تأليف رامي عبده قاسم علي 

انا صومت العشق ف غيابك
وفطرت وقت غروب الوحدة بحضورك
صليت ركعتين شكر ف رحابك
بعدها سميت وكسرت صيامي ع نورك

وكأن حضورك  دعوة مجابة
من قلب ما فهوش ولا ذرة إثم
دعالي بخير فتردت بيكي
واشوف النعمة ع اديكي بتحصل وتم

انتي تجلي الوعد ف كلام ربي
ان بعد العسر  بيسرك يزول كربي
وتصفالي الدنيا من تاني
كأنك عليها مصلحاني
والاقي كل اللي قاطعوني
بيحنوا ورجعوا يودوني
واحس بنفسي وكياني
وفجأة بقيت حبيب الكل
ودنيتي رجعت من تاني
فتحالي درعها و عوزاني

حياتي ما كان لهاش  قومة
لولاكي انتي

انتي في زمن ال لا معجزات
آيتي و معجزتي

كنتي سفينة نوح اللي نجتني من طوفان مصيره مخيف
كنتي الرؤية اللي نقلتني من كرب يوسف لعز  يوزرسيف

وكأني بيكي بتحول .. أو بتولد م الاول
ع اديكي كما عيل  .. بريئ وخام ونضيف

عليكي ابتسامة
بتغسل ذنوب الارض
خلتني ف عشقك كما الناسك
ماسك توبك بفرده واصلي الفرض
بصلي وادعيلك
في حياتي ربنا يديمك
يا فتح مبين .. ياحلم سنين
يا حق قلبي اللي كان ضايع وبيكي اترد

يو ما قابلتك
هليتي ونورتي
وبالخير بشرتي
من وعي خطفتيني وفيا اثرتي كتير
سلبتيني القرار والتفكير
كأنك ثورة وقامت
تنفي سنين فاتت
وتطالب بالتغير
صدقت الصدفة
وحسيتك خير

سنابلك ملئى وخضر
ابتسامتك تطول عمر
و حسنك ماله مثيل
عيونك كحلها نيل وشعرك لونه مسايا
قربك طمني و نزع الخوف من جوايا

ف برضى سلمت
او بمعنى أصح استسلمت
وأنا اللي قبلك عمري ماتعودت
آمن حد
شفتك قلبي من ثباته اتشد
كأنه البر ونظرة عنيكي المد
كأنك سؤال عليه اترد بموافقة
وقبل ما تتلاقى حروفنا
كانت عنيكي بالردود سابقة
شفت معاكي المحال نافع
والتقيت عمري اللي ضاع راجع
لأول مرة قلبي يطمن
و عقلي للظنون مانع

هلالك هل  ..  ومعاه الحل
لكل اسألتي .. وشكوكي وظنوني
بدون ازاي وامتى وهل
قلبتي كياني و غيرتي مضموني

وزقيتي سكوني خطوتين قدام
وجدتي لأي علة او استفهام
  إجابة تطمن بكرة
في ارضي الخايفة كنتي البذرة
اللي طرحت أمان واستقرار
بالنسبالي انتي الحضن
مأوة وضلى وستر ودار

يا فرحة مش ع البال
يا واقع بيمحي خيال
وجودك تأكيد بينفي محال
ويثبت حدوثه وإمكانه

يامرتبة المتلخبط جوايا
ومرجعة التايه لاصله ومكانه

يا دعوة من حدي وكفارة لذنوبي
يا حتة سكر في عروقي بتدوبي
مكانك في قلبي ارض اتمهدت بحنان
أساسها المودة والوفا عمدان
وحطانها من طوبي

يا سحر بيحول المستحيل ممكن
يا كنز محتاج انه يتأمن
من مكر الدنيا والاعيبها

انا واحد شاف الجنة بعينه ومع ذلك مش قادر يوصفها

شفتك وكأني لأول مرة
ف عمري بشوف
واحدة الدنيا ماشية ف طوعها
هادية قوية فريدة من نوعها
لو غابت عني افرح برجوعها
فرحة تايه راجع لأمه
بعد ما كان هيموت م الخوف

جمالك رغم كونه بسيط
تاهت عيني في تفاصيلك
ملامحك واخدة من طبعك
برائتك سر تكوينك

هدوئك خام حنين صافي
جنونك نار يلزمها مطافي
حدفت صوبك خطافي
واذ بيكي انتي اللي صيداني
صورتك صدى في عنيا
وصوتك مرسوم ف وداني

لسانك وهو بينطق
وداني في العسل تغرق
شفايفك يدوب تتحرك
عيني معجبة بتتفرج
وعقلي ف الخيال يبدأ

و غمضة عينك وهي بتضحك
بتصحي الأمل فيا
يا أحلى تقويل لاحلامي
يا أبلغ معنى ف كلامي
واسلم جزء ف النية

بحبك ومن حقي احسك ملكي وبس
دا انا بتجنن لو مسك حتى شعاع الشمس
يافرحة بتأمن وتطمن بكرة
وتطيب وتراضي ف وجع الامس

تملي بحس ف حضنك راحة
كأنك خضرة
وقت الفجرية
ممدودة مساحة
كأنك نسمة 
وقت الظهرية
بتروي الحر
خطيتي بقدمك ارضي البور
طرحت بركاتك و زرعي اخضر


لو عليا هبنيلك من ضلوعي مقام
والف حواليكي
وا لملم سنيني اعقدهالك سبحة
تذكري بيها فتبارك بيكي

من اللحظة دي انا ليكي
هقطع علاقتي بالدنيا
وكفاية اعيش لجلك
هأجل شغلي ومشاغلي
وافضى لأي شيء دايقك

فداكي الغالي والمهم
الصعب لجل عيونك يتم
ينسمة في الهدوء بتلم
وتفرقها سعادة

يا محلية الدنيا بزيادة
يابنبونتي
ياحبيبتي وصاحبتي وبنتي
الفرح بان لي يوم بنتي
ودقيتي عليا  الباب
يامضاد حيوي الإكتئاب
يانعمة وفضل من ربي
وفيض م اليسر بعد عذاب

صدق اللي قال .. النصيب غلاب
دورت بعمري عليكي ودقيت ع ١٠٠ باب
وزي الارض ما بتخبي في جوفها الماس
دورت لحد ما طلعتك من بين الناس
وما عدش معايا خلاص فارق
مين فاضل جنبي ومين فارق
انا بيكي مكمل وهسابق واعمل انجاز

احساس قربك نعمة كبيرة

حروفي العاجزة ما توصفهاش

انا قبلك واحد عاش ع الهامش

وبخط اديكي قدر يكتب اول سطر

كأنه سنين عايش صايم

وكأن هلالك عيد الفطر

يا أحلى وأجمل من كل اللي اتمنيته
وكأن قلبي عيل تايه رجعتيه لبيته
نستيه كل صدماته واوجاعه
وحببتيه ف البشر والدنيا
بعد احتراف الكره بأنواعه

غيرتي اسلوبي و تفكيري
صلحتي عيوبي وتقصيري
وعدلتي ف طبعي وغيرتيه

وبدون ما احس
لعبتي ف الواقع وعدلتيه

البايظ صلحتيه
والناقص كملتية
غيرتي المشهد كله في عيني وجملتيه

ومهما احاول اوصلك احساسي
دايما بحتار ويتوه مني الوصف
قصاد كل الرائع فيكي
صعب يكفيكي ٢٨ حرف

ولا كل لغات العالم تقدر توصفلك
قيمتك جوايا واسبابي لحبك
احساسي بقربك
مفيش معنى يرادفه
يا حسن الحظ اللي بصادفه
انتي الخير المتشال لي
سنين ف الحب بحوش لك

كل الدواوين اللي اتكتبت
معانيها بتتغزل فيكي
كل اللوح اللي اترسمت
مرسومة برمش عنيكي

الفرحة قبل ما اقابلك
انا كنت حقيقي ما اعرفهاش
واللي زعلت اني خسرته زمان
بعد ماشفتك حمدت ربي انه ما جاش

نسيت الماضي ومش عايزه
ومتعشم ف الجاي عمار بيكي
كل الحاصل دلوقتي
كون ان انا قلته وبيه صدقتي
سببه اني بحبك و بموت فيكي
...........................

تعليقات