ابدا مش هنساك
قصيدة : أبداً مش هنساك
تأليف رامي عبده قاسم علي
ابدا مش هنساك
الجعان يحلم بسوق العيش
واللي طلع نابه على ما فيش
كل مناه النسيان
وأنا إنسان من فرط الحزن بيتألم
كان مقسوم لي ع اديك اغلط واتعلم
ان دواية مش ف النسيان
انا علاجي اني افضل فاكرك
بكل تفاصيلك صوتك همسك شكلك
عيوبك وهمومك ومشاكلك
وما بين قادر ومش قادر
اسلوب نفي بطعم ال .. مش
وأنا واحد قادر
بس اختار يفضل فاكر
عشان الغلطة ما تتكررش
عشان ما اغلطش مرة كمان
وابقى ضحية بكل بسهولة
وا ادخل نفسي في رهان خسران
وارجع مهزوم م الجولة الاولى
مش معقولة انساك
دا انا لوحبيت انسى
قلبي هيفضل فاكرك
با امارة اسمي المشطوب ف دفاترك
وصوت ضحكك
وانت سامعني بتقطع قدامك واترجاك
ابدا مش هنساك
ولو ايامي قدرت تمليك من جوايا
انا عقلي شايلك اللي ما حدش يقدر ينساه
دمع وجرح واه
ايام حلوة وضاعت مني
على وهم انا عشت اجري وراه
دا انت فايتلي اللي يكفيني سنين قدام
جرحك دستوري قانوني اللي ماشي عليه واصحى وانام واطلب ف رضاه
بوزن كل الناس بميزانك
وادقق واتحقق منهم
ليكونوا شربين من طينك
او نقلينك صورة بكربونة
زيك مشاعرهم ملعونة
وأنا مش ناقص ف حياتي عاهات
خلصت عليك كل الاسفات
ونفذ مني رصيد الصبر
انا كنت يوماتي بوصلك ف حياة
وانت لأحلامي اديق م القبر
عمري ما صليت ودعيت
ولا مرة بخشوعي بكيت
وطلبت من ربي اني انساك
ولو حد دعالي ينزاح همك من جوايا
وتصبح سيرتك ماضي ومرمي ورايا
بزعل واغضب
مش عايز اهرب م الحقيقة
عايز افتكرك كل دقيقة
افتكر الدرس
ولو دبل زرعك
الحق نفسي وأبدأ من تاني الغرس
عايز شجرت غدرك تطرح قدامي
عايز ما انساش مين ع ايده انتحرت احلامي بحبال اليأس
يا اسوء واشر الناس
انا عكس الناس
من غير تفسر مش عاوز انساك وخلاص
شايف تجربتي معاك منهج ودليل ونبراس
كوكتيل كورسات جرح وغدر وحسرات
اتعلمته ع اديك ببلاش
يا بلاش
كتر الف خيرك
انا بكرة هعرف قمتي ف بعدك
واني كسبت اكيد لما خسرتك
بغلاوة غيرك
هيجيني اللي يسكر مرك
ويكسر ف ماضيك ويجرك
برا حياتي ذليل مطرود
وينفيك من جنة قلبي
ويطهر روحي و دمي من سمك
و فيوم هسمع عنك كل شر اللي يسر
واتفرج ع عمرك بيضيع منك ويمر
وتشفني وأنا بتمتع ف نعيم غيرك
وتحس انك محبوس ف ذنوبك مع انك حر
واليوم دا قريب مش شايفه بعيد
عمال بتفرج ع شجرة شرك
وهي بتكبر وتغرك وتفرع وتزيد
وقول لنفسي هانت
لحظة اخد الطار آنت
ورميك برصاصة الشفقة
واتفرج ع سوء وضعك
وهو ينزف قدامي
وغرورك وكرامتك خدامي
وعنيك اسفه بتترجى
فيسكت قلبك بعد الرجة
وأعلن لحظة موتك بداية نضيفة لايامي
تعليقات
إرسال تعليق