احوال شخصية

قصيدة : احوال شخصية
تأليف : رامي عبده قاسم علي

صورة ضوئية من ملف قضية
مرفوعة امام الدايرة الفلانية 
رقمها ١١ سنة ضايعين لسنة ٢٠٢٠
احوال شخصية

افتتحت الجلسة بحضور الخصمين .. ام و طفلين
البكري يادوب شادد حيله .. والتاني رضيع من صدر حزين
والاب .. ياساتر يارب 
بني ادم بيتاجر ف القسوة وفعله مشين


بتقول الام يا سيادة القاضي جاية وطالبة نفقة لعياله
مش جاية لا سمح الله .. ع الغدر ونوياله
بالعكس دا انا دعياله .. ربنا يهديه و يصلح حاله

طالبة المصاريف .. بصراحة الوضع معدش ظريف
و مش معقولة ابوهم حي يرزق
وانا من نص الشهر بقضيها شحاته وتسليف 

١٠٠٠ جنيه ف الشهر يا بيه
ام ل طفلين تعمل بيهم ايه
ولا اقولك .. هشتري كراسة وعلبة الوان
وهقول لبني ارسم فاكهة ولحمة وبسبوسة كمان
واكتب يابني انك شبعان فرحان وكمان مبسوط
١٠٠٠ جنية يا سيادة القاضي ..  ما تفتحش بيوت

رد الاب اسف مش هقدر 
واقف عمال يكدب ويبرر
في الفاضية بيصرف ويبعزق
وف لحمه ودمة بيستخسر

و بدال ما يلم اللي اتبعتر
بيعريها قصاد الخلق بخسة ولوم
نكدية  .. وش اذية 
وحياتي معاها  كات صعب تدوم
عمري ما شفت الراحة معاها ف يوم

وعند بعند .. خرجت فجأة عن الصمت هو يقول وتكدب فيه
وبعد شوية .. قام الطفل بعفوية بينده ابوه وبيجري عليه
هو احنا يابابا مش واحشينك 
سايبنا وواقف وحدك ليه

عيل وبيدي لابوه درس وعبرة
بذرة بحنية بتتطمن ع الشجرة
مشهد يدعوا للدهشة والحسرة

سكت الطفل لفترة وبعدين كمل
بيحاول يتأمل مش فاهم وضعه
كفه صغير مش طايل من ابوه غير صابعه

بابا .. شكرا قوي على وعدك ليا
قولتلي هخرجك خروجة هدية
 هي دي بقا يا بابا المسرحية ؟
بس فين الضحك يابابا ؟ فين مسرح مصر و فين علي ربيع
ليه المسرح جمهوره بيبكي وليه ماما بتسرخ وتقول البيت بيضيع 
وليه عمو ابو روب اسود بيقول ان انت اناني واب فظيغ

سكت البقف وجاب للخلف
اتقدم محاميه  وبدأ القصف
وابتدت سطور الجريمة تتخط بإبداع
رص حجارة باطل و قذارة بكل الانواع
الست دي لا تصلح لتربية نشأ
وفجأة ترج حطان الجلسة بلا
اخرس قطع لسانك .. منك لله
دا انا بيت مفهوش راجل وبميت راجل شيلاه
بابي بخطري سداه بضهري وقفلاه
 انما هو ف بخيل وعويل
شكياه لصاحب وقريب وزميل
ولا حاجة سعادتك نافعة معاه

يكفيه انه اب غشيم .. جايبلي محامي لئيم
يجرح و يخوض فيا وانا عرض ولاده
ابني بيسمع امه بتتهان 
فيبص لابوه يلقيه فرحان 
وام عياله بتتعرى قصاده

فاق الطفل على حقيقة ابوه المرة
وجري على امه يمسح دمعتها وبالمرة
يتوضى من ذنب ابوه بدموعها الطاهرة 
ايد ممدودة بتحضن امه
ودموع نازلة بتعلن يتمه

فهم الطفل .. كبر العيل .. شعوره اتحول
وابتدى يوعى ويميز
و قال لامه .. اللي يدوق قلبك كاس ظلمه
اكيد من غيره هبقى كويس

ايا كان مين الكاسر
بتكون الحسرة ع المكسور
والعتمة بتظهر وتبان ف غياب النور
لا قانون ولا عرف ولا دستور ..
الله وكيل .. لا قاضي ولا وكيل .. بيردوا الحق
شرخ الظلم 
عمال يكبر ف جدار الروح لحد ما بان واتحول شق


وجلسة ورا جلسة 
ام بطفلين لسة بتندب حالها وجالسة
عشمانة بطيبة تشوف م القانون انصاف
بتشوف قدامها .. ايامها واحلامها 
مجرد تواريخ لملف قضية بتنضاف
وقت طويل .. نقض ف تأجيل .. بعده مداولة
ومحاولة ورا محاولة مصير مجهول ممنوع يتشاف

دايرة و مقفولة ملهاش مخرج
يدين مكتوفة و عمالة بتتفرج
ع عمر بيخلص .. وعزيمة بتنقص
ظلم بيرقص .. مع حق اعرج

وتقضي العمر ف دوامة
مش عارفة هتعمل ايه .. وتروح بالشيلة لمين
وبعد سنين ياما
تاخد جزء يقضي وبالعافية .. اتعاب خمسة محامين

قصيدة : احوال شخصية
تأليف : رامي عبده قاسم علي

تعليقات