واش .. يا واش


قصيدة : واش .. يا واش
تأليف : رامي عبده قاسم علي


ياشاغلة عقلك .. بكلامهم الخايب 
وفايتة قلبك من فرط القلق دايب

ماكنتي عايشة ف حالك .. ومرتاحة ف حمى صبرك
ولا عمره كان شاغلك .. يجي النصيب بدري ولا يتأخر
ليه ؟ اديتي الفرصة لكلامهم .. يأثر فيكي ويغير


وزوكي ع بكرة .. وروكي اللي جاي سراب
لعبوا ف دماغك .. زي كورة شراب
يعيني ع بختك .. محسودة واكيد حظك 
خدله عين واتصاب
كلام رخيص قيمته .. تساوي وزنه تراب


مسكوا لجام عقلك .. هزوا الثقة ف نفسك
خلوا الرضا ف قلبك من عدل النصيب يائس
خلوكي تصدقي الكدبة .. وتقولي بقيت عانس

عابوا ف انوثتك .. عيروكي بعنوستك .. 
وكأنه عيب خلقي او مولودة بإعاقة .. 
كأنه ف ايدكي تعملي حاجة .. وانتي اللي قصرتي
كأن النصيب بالكيف .. ملوكي وهم وزيف .. 
امنتي بالتخاريف .. وسلمتي نفسك لكلامهم الجارح
خلوكي تمشي ف طريق بكرة ..... بصة على امبارح

بتشكي الحظ وتقولي .. منسية لحالي وبطولي
عايشة وحيدة مقسومة .. 
مابين الفكر والحيرة .. مكسور بخطري ومحرومة
الكل بناله بيت ف الفرح .. وانا ع الفرحة معزومة


الدنيا حالفة ما تنصفني .. نصيبي وراه مدوخني
وبيلعب معايا استغماية ..
بادئة القصة بنهاية .. وغيرتي ف اصول السرد
اسألتك كلها تايهة .. ف علم الغيب وملهاش رد

ياعالم بكرة ايه حاصل .. محدش ف نصيبه بيفاصل
و هو احنا من امتى بإدينا .. نقابل او نفارق حد

الكلمة الحلوة يمراحب بيها .. والكلمة اللي بتإذي متسمعهاش
واش .. ياواش

نصيبك لا بد هيصيبك
مقسوم لك وان تهتي هيجيبك
ف اهدي شوة وخديلك م الصبر كذا نايب
دا الحب بيجي ع غفلة .. مش وقت ما القلب يكون حابب

رفقا ع قلبك يابنية
دي الفرحة اكيد يوم جاية
بس انتي اصتبري شوية .. ما تستعجليهاش

دا القطر ان فات بيفوت المستعجل
وبيوصل ف ميعاد المستني
يعني اتأني .. واش يا واش

وكفاية رسايل بلا عنوان
قلبك ساعي ف مراسيلك ضل
ليه تفوتي مشاعرك ف الطل
لعيل طايش بغريزة
ديب متربص لفريسة
وغرضه تسالي
لو حسك سهلة وتتطالي
هيسوق فيها ويتعزز
هيشوفك لبه اللي اتقزقز
كباية شاي .. بالنسباله
بعد ما يكلك .. بدموعك يحبس

لو داق الحلو .. هيدوق مر
لو طال غرضه ع ايه يتطر
يشقى ويتعب لجل ما يوصل
كوني الحلم اللي يصلي ويدعي
ويترجى الدنيا  عشان يحصل

كوني الغالية .. النجمة العالية
اللي يسخر وقته ويسهر يراقبها
كوني الحاجة اللي ف تعبه 
يجري عليها لانه حابيبها
كونيله حنان .. وكر امان
من غدر الدنيا والاعيبها
كوني الحاجة اللي تجيب اجله
لوفكر لحظة انه يسيبها

كلمة بحبك ....  لو قالها 
بدون ذكر ف أفعاله ..... ما تصدقيهاش 
من حكمة ربي ف خلقه
جعل المولى الكلااااااام ببلاش
لو حد بيدفع في كلامه فلوس
كنتي هتلقي الناس خرصة 
مشية تشاور ..حتى ازيك ما تقولهاش
واش يا واش

وقت اما تحسي بخوف م الجاي
افتكري انتي اتربيتي ازاي
اخلاقك اية .. وعودك ناي
تتلوى قصاده التعابيين
انتي لمين .. امتى وفين .. الله اعلم
بس اكيد واحد يستاهل
كد وشقى راجل .. راحة باله دفعها مقدم
 لحد مايجي اللي يقوله .. انا شاري رضاها وجاي اتقدم
 

اوعي تخلي ابوكي ف يوم يندم 
اوعاكي تهدي شقاه ع الفاضي 
وترمي الوردة اللي سقاها بعمره ف ايد كلب
وتفوتي مشاعرك ف ادين واحد جواه مقرف عايز يتكب
ما ينوبك م البصلة الا ريحتها
وبنت الناس ايه غير سمعتها 
وسيرة تملي بالخير تتقال

في بنات تعرف تختار رجالة 
وبنات كيفها تفتح بالة .. وتقلب في عيال
والفرق ما بين الاتنين واضح
واحدة اتربت ع الصالح .. والتانية شمال

و الراجل منا بيرمي السهلة ورا ضهره
وبيجري ورا اللي تطلع عينه
وتهد ف حيل عنده وصبره

كوني له ستر وغطا زي الهدمة
كوني لتعبه مكافأة نهاية الخدمة
كوني النور لحياته بعد الظلمة 
وزيني ارضة بظلك وسماه بنورك
بكرة اكيد الهنا هيزورك .. 
ويضل ف حضنك مايسبكيش
بس انتي انتظري وما تمليش .. 
ربك قادر ما بينساش .. واش ياواش


كله بوقته يابنت الناس
الخير جايلك ولا اتسد عليه ب ١٠٠ ترباس
استني اللي يقدر تعبك .. وانتي بتستنيه
ويفهم انك لجله عانيتي .. و مريتي بإيه
انك ياما دافعتي بروحك عن حقه 
ورفضتي لغيره   ..  المسموح ليه
كدا يعرف انك غالية و تستهليه
وحقك تتشالي فوق الراس
وان شقاه لجل ما يوصلك
عمره ماكان ع الفاضي
ولو هو الفارس بحصان ابيض
ف انتي الخضرة بنت القاضي


خليكي ف نوع الرجالة .. اللي بتفعل مش بس قوالة
خليكي مع اللي يقدر .. وان قلت ف اديه دلوقتي
ع وشك بكرة خيره هيكتر
اختاري لبيتك .. اب واخ وزوج وصديقذ
لو نشف ريئك طول المشوار
نظرة عينيه تبل الريق
لو بيتك لونه قلب بحريق .. يطفيه بحنانه
واحد تتداري م الدنيا بين احضانه
يكونلك ستر .. سقف البيت وحطانه
وتكوني وراه وف ظهره عمود
عانس .. احسن ١٠٠ مرة .. ما يقولي عليكي خرج بيوت
استني لحد مايجي اللي مقاسه ع حلمك مظبوط
غير كدا سيبي  ب ١٠٠٠ سلامة القطر يفوت








تعليقات