انا المصري


شمس الغربة عتمة وبرد 
وليلها دوشة م الافكار
حنين بيسوق لريحة الدار

انا المصري .. سليل الفراعنة وعرقي اصيل
اعوذ بالله من انا .. في شهر ... الجاي هتم ٧٠٠٠ سنة
امي المحروسة و من صغري باكل خير  و ارضع نيل
عشان كدا لوني مدي ع قمحي 
تشوفني تحس الطيبة ف ملامحي 
جذوري غرسها مبروك 
فطبيعي خيرها يكون طرحي

نهاري صحبة وشمس
وليلي سامر انس 
صوتي غنى ومواويل
ابن نكتة .. ودمي خفيف
لساني ع العايب كحد السيف
والعادي قصادي يواجهه سيل
يدوق الويل وشر هزيمة
منا المصري اللي من يومه اتولد بعزيمة
المعمورة بلا بلدي .. مالها سعر ولا قيمة
رابطة شرق بغرب .. قادرة تفوت ف الصعب
بلد المعجزات .. اول الحضارات
مهد للديانات .. صاينها وراعيها الرب

طول عمرك بيت العيلة
وتفضلي يا بلدي قد الحمل والشيلة
كأنك ام بديلة او خالة
تعيش وتضمي من بلد الفرات زوار
واخواتنا اللي هربوا من جحيم بشار
ويمني وسوداني يشاركوني 


طول عمري بتكلم .. وصوتي ندا مسموع
طول عمري بتألم .. ولا مرة زارني الجوع
طول عمري سايبها ع ربي ومسلم
مصري يعني  يهودي ابن عم مسيحي واخوهم مسلم
مصري يعني موسى وعيسى وانبياء كتير غيرهم
ملوا البلد دي ببركة بشايرهم 
لحد نبينا المصطفى الهادي
طور سينين .. و سانت كاترين .. ومقام الحسين 
كلهم ف نفس البلد عادي

ببكي ف عز الضحكة وف وسط الحزن بنزل ضحك
واشجع بلدي ف نهائي .. و

عشت جميع العصور وجربت شتى الحكام 
فرعوني ورماني .. قبطي واسلامي .. مدني او ميري

لا حد يوم ساقني .. او تحكم فحلمي ومصيري
ولا حد قدر يشكلني .. احتلوا الارض بعض اعوام
غرقوا ف بحوري .. وف موجهم كنت انا عوام
عايش بقالي ٧٠٠٠ عام
وانا المصري
عايش براس مرفوعة .. فوق كتاف اسد
  ف قلبي شريان النيل .. بيسقي اجمل البلد

تعليقات