ايوة واحشني
ايوة .. واحشني
نص من تأليف : رامي عبده قاسم علي
ايوة واحشني بتكلم جد .. انا ما بهزرش
انا جاية اثبتلك ان كلامك صح
وان انا فعلا ما اقدرش
نفسي اكفر عن ذنبي
واغسل قلبي بطيبة قلبك
رجعالك مكسوفة بقدم خطوة وبأخر الف
عشمانة ف طيبتك ورجولتك
تقبل بنتك وتشوفها بعين العطف
انا راجعة بندمي اساومك بيه
ع حتة ف قلبك لسة بتعشقني وقابلة رجعوعي
ما قفلتش بابك لسة مواربه لموضوعي
و عرفاك مش ممكن تكسفني
لسة بشوفك نفس الراجل
اللي بلطفه وذوقه دايما يغلبني
عقلي الخايب عمال بيأنبني
ازاي فكرت البعد دا هين
ايوة ندمت ومن بدري
بس كرامتي رافضة تبين
يخربيت العند اللي ركبني
وشيطان وزك بسهولة تسيبني
كان مفروض قبل ما اسوق فيها
تلحق احلامنا قبل ما اصفيها
و تمنعني بزوق او عافية
كان لازم وقتها تغصبني
سيبني احكي لك
عن ايامي الخسرانة
و ازاي من غيرك قضيتهم
جربت ف بعدك حوليا اجمعهم
واعمل عزوة انساك بيها
بدلت الجاي بناس غيرك
سبتك و مشيت عكس طريقك
فكرت العشرة اللي مابيني وبينك
سهل الايام تمحيها
واديني رجعت لحضنك ندمانة
وعرفت ان انا مهما اتغطيت بيهم
من غيرك هفضل عريانة
انت الفرد اللي انا بيه بكمل
وهما جموع ما تزودش..
اللمة في بعدك .. توهة ف زحمة
والوحدة في قربك .. ستر ولمة
انت اللي وجودك بيأثر
وانت اللي غروبك بينور ..
وشروقهم ظلمة ما بتنورش..
ايوة انا غلطانة ما بنكرش..
طول عمري بسوق الدنيا بعقلي
برسم على مهلي واتكتك واخطط
من يوم بعدك واتبدل حالي
قلبي العيل عمال بيزن وبيعيط
احساسي بغيرك متحنط مش قابل حد
كل اللي انا قلته حقيقي والله بجد
كل دا كتماه جواية ونفسي اقولهولك
بس كرامتي بتنقح منعاني
وان كانت طاعة قلبي وراحتي
هتيجي ع حساب اعصابي و مصلحتي
فأنا بعلن رفضي و عصياني
ولو حتى كان غلطي ماليني
من ساسي لراسي وغطاني
انا عندي اموت من جوع حبك
و احرق جوفي بنار رغباتي المكبوتة
ولا اني اجازف واروحلك
فارجع بدماغي في حيطة رفضك مخبوطة
يمكن اكون غلطانة صحيح
وفي حقك افعالي شنيعة و مش مظبوطة
بس انت الراجل
يعني انت اللي تقرب مني
وتقدملي السبت يطمني
فارد الحد واكون لك شاكرة و مبسوطة
ايوة هموت وارجع لك لكن ما بقولش
ايوة بقولها لنفسي..لكن قدامك ما اقدرش
ايوة واحشني .. بتكلم جد .. أنا ما بهزرش
ايوة .. واحشني
نص من تأليف : رامي عبده قاسم علي
تعليقات
إرسال تعليق