دم غزال
تأليف : رامي عبده قاسم علي
بتاريخ ٢٠٢٢/٨/٦
نصيحة عامة
للناس المهتمة
انا قلبي خط احمر
الروح هلكانة
والعقل اتدمر
انا حابب اقول
لو ناوى ع دخول لحياتي
فقبل ما تدخل استنى شوية و فكر
وخليك فاكر
ان انا قلبي خط احمر
احذرني صحيح
يا تمشيها معايا اصول
يا تفوت الباب مقفول في وش الريح
و بدون تجريح او خوض ف كلام
انا غرضي اعفيك من رد الفعل
عشان بالفعل قدامك واحد
صدره اتكسر من كتر جروحة
واحد من كتر ما شاف
قرر ما يحبش غير روحه
روحه وبس
وحب الناس بالنسباله كلاكس
في زحمة ظهر غتيتة
جربت القلب الطيب وياهم
لقيت العيشة مميتة
طبل وظيطة وهيصة وتنطيط
شوية ارقص ع الحبل ف علاقة غريبة
نهايتها قلب وحرفين ع الحيط
وشوية اسرح ف قلوب حبتني
محض الصدفة بيهم جمعتني
و عشرة أفعالهم خلتني
احس اني في حالة توريط
وانا مش عبيط عشان تلعب بمشاعري
انا بقدر اشوف الحب من ع بعد اميال
بس لسوء حظي الدايم
كل اللي انا حبتهم طلعوا عيال
عملوا مشاعري سهم ف بورصة
البيع ع الكيف و الغدر برخصة
وسعيدة الفرصة ع الاندال
يا ما قاومت احتلال الكدب
للحب بصبر وطولة بال
ولجل التأكيد
انا مش عبيط او شخص مغفل
لكن تقدر تقول ف الحب احول
بشوف يميني بعيني كأنه شمال
في حوارات الحب انا مش واحد فالح
انا عايزك فايق ومركز جدا
ف كلامي اللي اتقال
انا قلبي صحيح خط أحمر
بس احمر فاتح دم غزال
قصيدة : دم غزال
تأليف : رامي عبده قاسم علي
بتاريخ ٢٠٢٢/٨/٦
تعليقات
إرسال تعليق