بيقولوا جراح
قصيدة : بيقولوا جراح
تأليف : رامي عبده قاسم علي
بيقولوا جراح
طب يجوا يشوفوا الجرح بجد
بيبقى ازاي
دا الواحـد قـاسـىٰ وحيلـه إتهد
رايح جاي
يقابل نـاس و يفارق ناس
ولا يوم إرتاح
مش معنى الضحكة ع وشي إني كيوت
ساعات متطر اجاريكم وبان مبسوط
ويعلم ربي ايه الحال
بداري الحزن وبقول عال
ومن جواية نار قايدة
بتاكل فيا من غير صوت
صحيح عايش وحي ارزق
لكن روحي ساكنة تابوت
ومش مفروض عليا اشكي
بشيل الحمل ساكت بدون ما احكي
وف عز ما أنا قرفان
يبصولي من زاوية الفرحان
ويقولوا عايش في مية البطيخ
انا ساكت صحيح لكن
صمتي في أصله صريخ
وروحي بتستنجد بناس ماترحمش
و حظي دايما واقع مع قلب بايع ما قدرش
حوشت الاماني والوعود والرغبات
عشت ف قلوب ناس
وناس فاتوا كما محطات
عاشوا ايامي وسهرت لياليهم
عز عليا ناس فيهم
وناس خسارتهم طلعت انتصارات
والدنيا من امتى بتدي اختيارات
دايما الفعل اجباري
دايما بايعة وانا شاري
والحزن في ظهر الفرح بيكسر الفقرات
ويشل الرغبة في العيشة
جويا تحويشة مش لاقية اللي يصرفها
احلامي مشروعة مش لاقية اللي ينصفها
والدنيا تعريفها دار غلب و شقى
بتكدب الطيب .. والملعون مأمناله ومصدقة
افهم بقى .. سيبك من التوهة وفوق
الدنيا مش ع الكيف
دار باطل وزيف
و بتتاخد عافية وملهاش ف الزوق
هتعيش غلبان .. تتهان
مهما لزقت ف حيط هتبان
هتعافر وتقاتل هتحلو معاك وتروق
هتركب وتدلدل وتسوق وتعيش سلطان
عيش في الغابة اسد تهابك الخرفان
قصيدة : بيقولوا جراح
تأليف : رامي عبده قاسم علي
تعليقات
إرسال تعليق