يوم حبيتك 💞
قصيدة : يوم حبيتك
تأليف : رامي عبده قاسم علي
يوم حبيتك
كات طاقة قدر اتفتحت لي
والدنيا بعد عداوة
رضيت عني وصفيت لي
كإنك جاية تحلي ..
ف كل مشاكلي
وتقعدي لجلي
مع الدنيا في قاعدة صلح
كإن جناين صبري المرادي
ناوية اخيرا ع ايدك تطرح فرح
وكأن الجرح استسلم ع ايدك
يوم حبيتك
يوم حبيتك
حيرتي القلب ف تكوينك
لخبطتي العقل ف تركيبتك
قلبتي دماغي وبرجلتيني
هو انتي اللي بحسنك جبتيني
ولا انا حظي الحلو اللي شاور لك
كل مرة ببص ف عينك
بحس إن أنا من ربنا خجلان
مكسوف يا حبيبتي اطلب شيء تاني
وأنا لسة ف نعمة حبك غرقان
خليتي الدنيا ف قربك طعمها حبك
خليتي القلب ف بعدك مشتاق لأمان
مستني الحظة اللي يقبلك
زي المتوضي وقاعد مستني ادان
عشقك متعة وراحة وامان ع حبة جنان
قدرتي تنسيني الماضي كأنه ما كان
رجعت اعشق واتغزل و اكتب أشعار
و عنية اللي بقالها سنين ساكنة الضلمة
رجعت فجأة توحشها الالوان
انا بيكي كل بنات حوا
بقيت زاهد فيهم
ولما اضعف مرة وابصلهم
ارجع بص عينك تمحيهم
يا معاليهم ياست الحسن
يا عود ياسمين مزين حضن
تتشل العين اللي تخونك
وضربة ف قلب اللي يدايقك
دا انتي اللي معاه زيك ..
لازم يحمد ربه
مين طايل حد يحبه
بمشكله وهمه وكل عيوبه
دا انا جيت لك وانا كلي واجعني
قلبك طمني وساعني
وداوى الماضي بكل ذنوبه
كل طباعي الوحشة
جاين ع ايدك بيتوبوا
وبعلن للدنيا بحالها اني بحبك
ومن يوم ما سكنت في حضنك
غيرت العنوان ف بطاقتي
واسمي الكامل من دلوقتي
عاشق بجنون ....... ويليه اسمك
قصيدة : يوم حبيتك
تأليف : رامي عبده قاسم علي
تعليقات
إرسال تعليق