طريق الكدب
قصيدة : طريق الكدب
تأليف : رامي عبده قاسم علي
طول عمري موارب بابي .. مقفلتوش
طول عمر قلبي يساع م الحبايب ألف
جدعنة وشهامة وحنية وعطف
كأن مشاعري عرض متاح مجاني
دايما بختار ف الناس البايعاني
الشاري عمري ما بعته
والبايع كسبان بخسارته
والخاين احسنله يلف
ويفوتلي طريقي بدونه نظيف
مليت م الوحداني المتونس بيا كا وش الضيف
انا نفسي في حد
ف حياته عايزني بجد
مش واحد هيفوتني
اول قطره ما يوصل لرصيف
مليت فعلا ابقى وصيف
نفسي ف بني آدمين
نتكلم حبة ومايضرش
نضحك ونسف ونقلش
وأهو ميت بيلاغي حزين
بس نكون م الاول واضحين
وتعرفني انك فترة
عشان ما اعملش حسابك ف الذكرى
اصل الذكرى ياصاحبي من حق الغالين
وانت حاجزلك بس يومين ترتاح فيهم
قلبك وضميرك ريحهم انا عارف م الاول ايه فيهم
انا مستعبط ..لكن حاسس
م الاول اني بديل ..
حاجة تحلي .. حاجة تسلي الوقت
لحد خلاص الليل ..
وبكرة تمل .. وكلامنا يقل
وبعد ما كنا كما جسم و ظل
هنصبح خطين متوازيين
فكرة تقاطعهم شيء مستحيل ..
كان لازم تعرف م الاول
ان طريق الكدب اللي انت اختارته
صعب قوي يوصل لجميل ..
نص قصيدة : طريق الكدب
تأليف : رامي عبده قاسم علي
تعليقات
إرسال تعليق