حلوها ما كٔمِلش
قصيدة : حلوها ما كٔمِلش
تأليف : رامي عبده قاسم علي
عاقلة في زمن فيه الجنون بقى موضة
حنينة في وقت القسوى بقت حاجة مفروضة
بس يا خسارة .. حلوها ما كملش
عصفورتي محبوسة بين اربع حيطان
متشعبطة في امل خسران
وانا الحيران بينها وبين ماضيها
ملعون قلبي اللي مال ليها
وخلاني اروح اسد وارجع من عندها قطة
و دلوقتي انا في ورطة
لا عارف اكمل كما صاحب
ولا ابطل اكون حابب قربها مني
يارت كل الرائع فيها مكنش يشغلني
لكن لقا بنصيب
سهم وانكتب له يصيب .. وانا راضي
الحمد لله على لساني وعوض ربنا قصادي
بكرة تروق وتتظبط
ولو ع الحلم ف ربنا يعوض
واديني مكمل معاها طريق
لا انا حابب ولا محبوب
معدتش عندها محسوب
غير اني رفيق
يعني ياربي يوم ما اوصل لطريق
يوم ما القى الباب مفتاحه يضيع
يوم ما انوي اتوب م الوحدة
يجمعني نصيبي بوحدة
خايفة من الحب بشكل فظيع
زي غزالة بترمح هروبا من ديب
الخوف عامي عنيها بشكل غريب
من كتر الخوف بتسيب
بينها وبين الحب مسافة
مرتاحة بكونها العاقلة الخوافة
وجبانة ساعات لكن ما يضرش
حلفت ما تسيب القلب يأمن
اختارت م الوحدة مكانها الأمن
عشان الاعجاب مايمرش
ومايضرش لما الجايز قبل مايحصل
تكون حطاله حدود
رافضة حدوث المفروض
حاصرت قلعتها الخسرانة
ورا خرسانة وحطان و سدود
دخلت حدودك كما لاجئ
رفض قلبك يأذن بمرور
فـ ايه يجبرني ازرع فيكي وارضك بور
انا جيت لك من بابك قاصد خير
لقيت الماضي ما بيني وبينك صور
لقيتك رافضة ايي محاولة
واقف في طريقك مش قادر بتقدم
وكل ما احاول ردك فيا يندم
و خسرت الطعن اللي اتقدم من اول جولة
دايما شيفاه هو الاولى
وهو الصح
كدبتي عشانه المنطق
ونفيتي الجرح
هو الجزار اللي رقبتك
عشقت سكاكينه
هو الغدار اللي مشاعرك
رافضة تصدق و تدينه
ابليس اللي غواكي وخلاكي
كفرتي بنفسك وامنتي بدينه
سلمتيه نفسك عن طيب خاطر
حسستيني اني بجازف وبخاطر
لقتني في قلبك زي ملاك
بيحارب ساحر شاطر
لقيت ارضك منهوبة
ساذجة واحلامك مكتوبه
ومحجوزة بأسمه
ملقتش مكان فاضي في قلبك
يسمح للأحلام يترسموا
لقيتك خاوية ومهجورة
مشاعرك دبلانة و محصورة
لقيتك ظل ل
صورة اصلها هو
وهو .. ولا حطك في الصورة
لقيتك محبوسة بكيفك .. راضية بزيفك
و لا فارقة معاكي خرابك من جوة
اهم ما عندك يفضل هو
وامام هو كان لازم ارحل بسكوت
على ايه هفضل مستني ف قطرك
وانا واثق جدا انه اكيد هيفوت
قصيدة : حلوها ما كٔمِلش
تأليف : رامي عبده قاسم علي
تعليقات
إرسال تعليق