اتعلمت الدرس تمام
مش هقدر اقولك اي كلام يجرح
منا لو جرحتك هبقى اذيت نفسي
منا اللي نديتك وحبيتك و اخترتك
وانا اللي بضعف شخصيتي معاكي
عليا غيرتك
كنتي الطوع لحد ما ضعفي قواكي
دلعي الزايد عن حده
بدال ما يهدي في اخلاقك عصاكي
والذنب اكيد ذنبي
كنت مفكر انك لما هتتحبي
هتحقي و تراعي
اتاري الحنية الزايدة بتتلف
وطلعت طيبتي اسوء ما في طباعي
و بلا داعي لقيتك مليتي و زهقتي
بعد ما رميت محصول الحب بين رجلك
ازاي دلوقتي هتعرفي قيمتي
كان لك حق تتعوجي وتتمادي
العيب ع اللي شاف ميلك
بيزيد مع الايام وقال عادي
عادي اديني بحاسب ع الطلبات
مع اني معاكي ما اكلتش غير ع عيني
محدش اتعلم ببلاش
كان لازم اقابلك واغلط ف تعلميني
انتي الدرس اللي اخدته م الدنيا
وطالع من عيني
انتي الغلطة .. انتي الورطة
انتي التوهة ف تفكيري واختياراتي
انتي النسخة الخسرانة من احلامي وقراراتي
انتي الخطوة اللي مكنش ليها اي لزوم
انتي اول وحدة من ايدها استطعم اني انا مهزوم
انتي الاحساس بالعري رغم ان دولابي معبي هدوم
انتي الفايدة من الحصة
وانتي العبرة من القصة
وانا مش هستنى كمان لسة
وافضل انفخ ف المخروم
اتعلمت اكيد م الوقعة ولوحدي هقوم
هزوم ع الحب وع قلبي
ويا ويله مني لو تاني دق ف يوم
اتعلمت ان لحالي امان
واني مدام بدي فـ من حقي القبض كمان
وان الحب مناولة مش زل وادمان
مش بطريقة قيس الولهان
اتعلمت انه ما ينفعش
ف حد غيري اكون عشمان
اتعلمت كل دروس الفزيا والكميا وتاريخ الانسان
من اول حوا وادم
لحد فلانة وفلان
تعليقات
إرسال تعليق