اتشرفت بجرحك

اختصرونا ف كلمة معلش
قالوا اللي بينا مجرد وهم و ما كملش

طلعت ضعيف وانتي جبانة
ملناش ف الحب ولا قد العشق
طلعنا ع بعض مش لايقين
طلعنا لمعنى الحب جهلة مش فاهمين
شفونا قليلين ع الحب
خلو المشوار في عنينا يبان صعب
رموني بظلم ورموكي بكدب
وانا بقولك .. خديها من قلب برضى حبك
من واحد بعدك عرف قيمتك
انا ياحبيبتي  ....   اتشرفت بجرحك

انتي ودونا عن غيرك
و لو مهما عملتي فـ بردو مسامحك
مش ضعف ولا هزيمة
ولا من نفسي بقل القيمة
انما حبك عمرة ما كان نقطة ضعف
ولا مكمن يتصنف كجريمة

كل الموضوع ..  ياحبيبتي
دنيا خبيثة لئيمة 
حبت تتفرج على السيما
جمعتنا اتنين عشاق ف سفينة
وف عرض الفرح اتخرم القارب
دنيا سخيفة و غاوية مقالب
بمزاجها و كيفها بتلعب بينا
عمر العيب يا حبيبتي ما كان فينا
ولا عمري ندمت ف يوم اني عرفتك
كان حبك فعلا نعمة ومصدر فرح
ولو حتى زي ماقالوا و كان حبك جرح
فانا فعلا يا حبيبتي ..... اتشرفت بجرحك

انا لما اخترتك
ما اخدتش على حبك م الدنيا ضمان
مكنتش اعرف ان سنيني معاكي
رقم ومسيره في يوم خلصان 
و ف وسط اللعبة مع الدنيا
ازاي كت اعرف 
مين فينا هيطلع خسران

ممكن اكون زعلان بحقيقي ومقهور
لكن حسن الحظ ان الايام بتدور
وعمالة بتثبت لي ان انا صح
وان نصيبي من الدنيا اخدته بقربك فرح
و حبة راحة ولو ليومين
ولأن الساعة بتوقيتك تسوى سنين
ف انا عشت كتير واتهنيت
يكفيكي انك اول واحدة 
لجل عنيها انطقها واقول حبيت

كل الحلو اللي مافيا 
بعض بسيط من طبعك
شراين قلبي دول اوتار 
لاعبتيهم ياما صوابعك
و رصيدك جواية كبير اوي
 يسمح لك
تفضلي طول عمرك اغلاهم
قابلت كتير بعدك ومشيت وياهم
ولا حد استجرى 
يدوس خطوى لمستيها بقدمك
يعلم ربك بمكنتك جوايا وقيمتك
يمكن قلت كتير وانتي ما صدقتيش
يمكن ابان عادي وعايش
انما بيني وبينك 
انا من غيرك 
ميت بيحاول تاني يعيش
زي النيش 
متشاف لكن مركون
كتاب عنوانه يشد صحيح
بس بدون مضمون
كنت الغالي في ايامك
كنتي اميرتي 
و كنت انا فارس احلامك 
لكن دلوقتي بكل سهولة بهون

مجنون وف عشقك درويش
فاتح شباكه ع الدنيا
ومن خوفه واقف ورا شيش
واحد عمره ما لف سيجارة
دلوقت بيزرع خيبة امله حشيش

يارتني صرخت يومها وقلت ماتمشيش
يارتني قدت في  وش البعد حريق 
يارتني قبلت اكونلك حتى صديق
بس افضل اشوفك علشان احيى
دلوقتي انا بمشي بعقلي ف ناحية
وروحي ف عكس طريق
بلعب ويا الدنيا لوحدي
بعدك مش لاقي فريق
انا في بحورك عمت كا السمكة 
و نزلت ف موجة غيرك طلعت غريق
ومساعنيش يوم غير بحرك

انا يا حبيبتي  ..  اتشرفت بجرحك
يا اروع مافات و احلى ما مر
يا ممري اللي عداني من خوفي لاماني
يا شعوري اللي عارف
اني مش هحسه ف يوم تاني
يا سكناني كما دارك
يملكاني وانت ف مكانك وانا هنا وحدي
عارفة بيفيوت عليا ازاي الوقت وانتي مش حدي
بيعدي

تعليقات