ياسُكنة ما تمت


قصيدة : ياسكنة ما تمت
تأليف : رامي عبده قاسم علي

بنيناها سوى م الاول 
ع الطوب الاحمر كانت
رسمنا قوضها
لونا حطانها
و قسمناها سوا لحد مابانت
فرشناها سوا ركن ركن
وتاتة تاتة
اخترنا سوا لون الستاير
وفردنا قصاد بعض السجادة

الكبيرة اوضتنا
وهناك سفرتنا
وهنا قعدتنا و سهرتنا
ليلاتي في وش التليفزيون
قدامنا عصير وفشار 
وبيك رولز بطعم زيتون
وخناقة دايرة مابينا
انا عايز الماتش وانتي متابعة العشق المجنون

شفتك جنبي .. واحنا واقفين ف البلكون  
وفي ايدي مشابك واقف اناولهالك 
وانتي بتنشري احلامي على حبل غسيل
عن قاعدتنا لبعد نص الليل
بحكيلك عن تقل مشاكلي
وعن نقط الضعف في حلى
فتشاركي معايا و نوصل لبديل 
كان دايما ليكي معايا جوة التفاصيل تفاصيل 

واتخيلنا سوا وانا واقف جانبك بطبخ لك
ولحقنا سوا كنكة قهوة 
عـلى الـنـــار بتفور ..
رضيت عشانك أنام في الظلمة 
علما إني بحب النور ..
وف الاخر انكرتي دا كله عليا 
بقسوة قلب و شـهـادة زوووووور ..
ومع اول ضربة من الدنيا
لميتي الاحلام ويا وعودك
وفتي عليا  البيت خاوي و مهجور
وع غفلة لقتني سهل في عينك
وانا شايف قلبك عمال بيجور

ياسكنة ماتمت
خدها البعد وطار
ياحلم العمر اللي انهار
يا ليل حالك سبتيني 
بدور فيه على خيط لنهار
شمسه تداوي في اوجاعي
لغبطتي الخطة وبرجلتي دفاعي
سبتي الدنيا بكل سهولة تهز شباكي
لقيت الكلمة وخداكي وجيباكي
وهان عليكي .. قلبي السهران ليكي
يبات دونك باكي

سلمت لبعدك ولضعفك وانا مجبور
عشت لوحدي في بعدك مقهور 
بقيت كل ما ازور البيت من غيرك
احس انه غريب عني
واحس وانا داخل اني
زي ما اكون غريب او ضيف
وان انا من غيرك داخل ضيف
حتى حطان البيت سألتني
فينها البنت ام دم خفيف

واسمع صوتك بيرن في كل مكان
اجري افتح كل البيبان .. عشمان
ادخل والاقيكي مابين سارة وسيف
قاعدة تذاكري لعيالنا اللي مجوش
كل حاجة زي ما سبتيها 
على حطة ايدك في مكانها
حتى المج بتاعك لسة مكانه ما شلتوش
من اخر مرة كنتي معايا
واخر كوبايتين شاي بردوا وما تشربوش


في مواضيع كنا فتحناها 
وبعدك عني لسة ما تقفلوش

البيت من غيرك زي القبر 
وقلبي وعقلي اتنين اموات 
ماتوا في بعدك ومدفنوش

كل التفاصل اللي مابنا 
من غيرك باردة ومملة مايتعاشوش 

اجري ادور زي المجنون جوة الشقة
 كل حاجة في مكانها اللي اخترتيه
لكن من غيرك مش لايقة 
في حاجات كات اصلا مش عجباني
ورضيت بيها لجل ما اشفكيش مدايقة
اديكي فتي البيت وصحابه 


وقولتيلي مشاعرك بكر خام
صدقني انت تمام و العيب فيا
وبرغم اني مكدب
رفضت وراكي احسب
كلامك صح وهزيت راسي وقلت تمام

اتاريني بزرع وحدي ف ارض الاحلام
وانتي اكمنك زوق سبتيني اسرح في الاوهام
مهنش عليكي وانا فرحان 
تقوليلي ساعتها لنفسك فوق
طب كنتي تقولي وانا متمرمغ 
في تراب وهمك إنك فوق
واني وصولي لعندك درب خيال
وان انا عمري ما جيت لك ع خاطر
ولا اصلا زي هيخطرلك ع بال
عشتيها معايا محرجة مضطرة
مش عارفة ازاي تقوليلي اطلع برة
وترميني بقسوة خارج بيتي
كان سهل تقولي من الاول
اني لمستك عمدا ولا حسيتي
 
قبل ما اقول  يخسارة  .. 
و ياسكنة ماتمت
يافرحة قبل ما منها 
أملي عنيا قدامي اتهدمت
ايدي اللي ف حضنك زرعت حب
جالها اليوم و في كرهك لمت
ياريت كات اسباب رفضك فهمت
كان متشالك ايه في الجاي
كان متشالك قلب 
في عتمة روحك هيكون لك ضي
وانا مش واحد زي ما شفتيه
ويجوز فيه بدال العيب عشرة 
انما واد راجل .. وخسارته تساوي الحسرة
وان كان ع قلبك فمسيره يفوق م السكرة
ويعرف ان الله حق
وابقي افتكري كلامي كويس 
يوم ما تحني لواحد ويقولك لأ 
وان كان على الوحدة 
ف مش ديمالك 
بكرة هيجي ويشغل بالك واحد لعبي
وساعتها هتفهمي قيمة وجعي و تعبي
وان اكمني قريب من ربي
فنجاني شرور افعالك
واخر كلمة هقولهالك
يالعنة ما حلت
ياسكنة ما تمت
نضفت ما لمت امثالك

قصيدة : ياسُكنة ما تمت
تأليف : رامي عبده قاسم علي


بقيت كل ما اروح من غيرك شقتنا 
احس ان انا داخل كأني غريب او ضيف
حتى حطان البيت عنك سألتني
اومال فين البنت ام دم خفيف 

ياسكنة ماتمت
خدها البعد وطار
ياحلم العمر اللي انهار
يا ليل حالك سبتيني 
بدور فيه على خيط لنهار
شمسه تداوي في اوجاعي
لغبطتي الخطة وبرجلتي دفاعي
سبتي الدنيا بكل سهولة تهز شباكي
لقيت الكلمة وخداكي وجيباكي
وهان عليكي .. قلبي السهران ليكي
يبات دونك باكي


بنيناها سوى م الاول 
ع الطوب الاحمر كانت
رسمنا قوضها
لونا حطانها
و قسمناها لحد مابانت

فرشناها حتة حتة 
ركن ركن و تاتا تاتا
اختارنا سوا لون الستاير
وفردنا قصاد بعض السجادة
الكبيرة اوضتنا
وهناك سفرتنا
وهنا قعدتنا و سهرتنا
ليلاتي في وش التليفزيون
قدامنا عصير وفشار 
وبيك رولز بطعم زيتون
وخناقة دايرة ما بينا 
انا عايز اتفرج ع الماتش
وانتي متابعة العشق المجنون

شفتك جنبي .. و واقفين ف البلكون  
وفي ايدي مشابك واقف اناولهالك 
وانتي بتنشري احلامي على حبل غسيل
عن قاعدتنا ع صوت الست لبعد نص الليل
بحكيلك عن تقل مشاكلي
وعن نقط الضعف في حلى
فتشاركي معايا و نوصل لبديل



تعليقات