أنا مغرور ؟!!!

اأنا مغرور ؟!!!
طب قول بأمارة إيه
شفت إيه يخليك تحكم ع العتمة 
إنهـا نــور ؟!!!
ليه عينك شايفة العزلة اللي أنا فيها 
قصر أمير زاهد ناسه 
ومعلي الصور
ليه ما يكنش صنع بعده 
اكمنه مشفش في خضرتهم أي قبول ..
مش جايز عايز حد يحس
 ويسـأل عن حــاله بـدون مـا يقــول ..
مش يمكن حاول لكن ما اقدرش 
فحس بإحباط منهم أو جاله خمـول ..
مش وارد اكون انسان عادي 
هـادي وراضـي وهو دا فعلا طبعـي
مش جايز اكون حابب أريح سمعي
من كتر كلام ع الفاضي و بدون مفعول ..

وأنا مش مسـؤول ابــدا  
عـن ســوء ظــنك فيـا ..
تشوفني الخيرات 
تشوفني السوءات
ما يفرقش كلامك عندي 
ولا نسبة ربع في المية ..
انا ادرى بحالي 
ونصيحتك ليا  
اكيد مقبولة و متشالة فـوق الراس
أنا مش قاطع 
ولا مقطــــوع   ..  ولا كــاره نــاس
انما جايز ما املكش كلام 
يصلح موضوع نفتحه بينا ..
انا حابب أبعد حالي 
عن قالـوا  وقولنا وفيه إنة ..
بسمع وانا قاعد وحدي هناك
بعيد عن ظن وشك وأذية ..
بتأمل كباية شاي في إديا ..
بخارها بيهرب م الشباك  
ومعاه افكار عقلي و حيرته ..
أنا مش مغرور .. أنا حد اختار 
يبعد حبة .. فتزيد في عنيهم قيمته ..

#شِعر_في_صورة

#Ramy_kassem

تعليقات