الموضوع ياسادة

الموضوع ياسادة
ابسط من البساطة بمرتين تلاتة
نفس القصة الفاشلة المتعادة
اتنين بالصدفة اتلاقوا 
فـ حبوا يلعبوا حبة
واد طايش 
و بنت عندها نقص اهتمام ومحبة
اتنين في السكة اتقابلوا ف طاشوا
استسلموا لمشاعر اطفالي
و ادوا العقل طناشوا

وبعيد عن اي نية خير
غمزت له برمش خطير
قام رد عليها الطايش رد شياطيني
انتي حبيبتي ونور عيني بتاعتي ولزماني
وهي ياعيني  محرومة م الحنية وبتعاني
قالها مزة عمري
قالتله تعالى في احضاني يا حبيبي وجاني
نفس القصة الفاشلة بتتعاد تاني
بنت شقية و لعبية 
مع عيل طايش واناني

والناتج جرح و مشاعر موجوعة
مهما يجيلها اللي يداوي 
هيلقى سككها ظلمة و مقطوعة
ويفوت عيل طايش 
قلب البنت من الخوف كاشش
دبلان دمعته مش مسموعة
مهما يجيلها اللي يطيب
هتسد في وشه وأمله تخيب
فتني لحالي يا عم الطيب
آسفة خلاص الثقة ممنوعة
 
النمرة اللي انت طالبها غلط
فكك من الحنية المصنوعة
ويزيدوا المجروحين تالت
وتموت كلمة حب بصدق اتقالت
ويتاخد في الرجلين قلب بدون ذنب
كان ماسك احلامه في ايده وماتت
وتتكر نفس القصة يوماتي
قلوب طاش خانت
و قلوب اتخانت ماتت
و قلوب حبت في قلوب مجروحة فهانت
نتيجة وبانت الغلطة هتفضل غلطة
والحب بقى توهة وورطة
احساس زايف كله اونطة
بالحب نمد أيادي
وفي لحظة بتفلت عادي
ونلم العشرة في شنطة
ونرميها النيل
محدش بقى باله طويل
 ولا انت بتقدر تتحمل
ولا عندي طاقة أكمل
واسخف كلمة بتتقال
آسف في وقت رحيل



محدش باقي محدش لاقي اللي يصون


وتمر الايام وتعدي حاجات
رسالة في مكالمة في سهرة في شات
ضحك ولعب والش وافشات
حتى خصام ما يضرش .. 
يليه محاولة مملة طويلة في خلاف ومصالحات
وتتعاد الكرة .. قلوب مضطرة تتمادى في حوارات

وفي الاخر تدوب شمعة زيفهم في نار الكدب
مين قال اصلا عيل طايش 
ويا القلودة اللعبية ممكن تجمعهم قصة حب

وتخلص قصة بلعبي ولعبية
بذنوب منقولة لناس 
ملهاش ذنب في قصتهم دية

دخلين في حياة ناس تنين 
ومعاهم ناقلين سوئاتهم
بيشوفوا الكل محطات
ويركزوا بس ع الغلطات
ولو جالهم حد يحب بجد
يقسوا و يتمادوا في اهماله
ناس عاشوا الحب حرام
صعب اكيد هيحسوا حلاله

ذنوب عالم مؤذية
و بتخلصها قلوب صافية نقية
وخاين يسلم قلب حبيبته السابقة ضحية
لو واحد مهما يحل عقدها 
ويحاول يظبط ساعته ع اوقاتها
يفضل شبح الخاين نازل فيها مرازية
ويتحول قلب الطيب اشغال شاقة
يفضل ينحت صخر الكره
وفي الاخر تيجي المدبوحة 
بسكينة عيل طايش وتقول لا

ومن قصة لقصة
وما بين اه ولا
هو دا حال الدنيا
مجاريح بترازي في قلوب صادقة



تعليقات