كفر العند
يقولوا اجمد كدا وانشف
وداري الدمعات
ويفتوا في حاجات
عايزني انام عادي
و اصحى م النوم هادي
اغسل وشي وقول خفيت
ياعالم دي كسرة قلب
مش رزعة دماغ في الحيط
لوسهل انساها.. مكنش ليليها سهرني
ولا كان الحزن قاتلني واخد روحي رهينة
انا من غيرها صحيح باين .. ورد جنابن
بس مجرد زينة
ودي بنت لزينة بنت معلم
طالع باللحم .. جرحها و معلم
وانا بتعلم .. من اسلوبها
رميت حسناتي .. وعجباني ذنوبها
عاجبني نظرتها للموضوع
اقولها حبيتك ..
افعالها تقول حبيتك اكتر
اقولها نقرب ..
تقولي طب بالعقل نفكر
اقول مش قادر ع بعدك ..
تقولي لاا اهدى كدا وسيطر
اتاريني م الاول كنت ضحية
لعبة وتسلية وقت بيملى فراغها مش اكتر
سحلتني من قلبي وعقلي في ديلها مجرجر
شيطانها فكر وخطط ودبر
لحد ما دمر احلامي
فرجتني على خيبتي بترقص قدامي
وضحكت عليا الخلق
في الاخر طالعة برئة
وانا ظالم ومليش حق
قالتهالي وش في وش
انت الغلطان معلش
انت اللي قلت بحبك
وانا من ذوقي ما قلتش لأ
كنت مفكر ان انا حاجة
وباقي الناس شيء تاني
اتاريني عايم في بحر سذاجة
وشارب منه لحد كيعاني
اكيد كنت بهزر
وازاي عشت مفكر
اني في لحظة هغير
خوف عشش جواها بقاله زمان
مين اوحالي ان انا خارق او سوبر مان
وقادر بسهولة اقنعها
تخرج من بحر التوهة لبري الآمن
واحدة قابلة في كفر العند تعيش
ولا انها لحظة بحبي تآمن
تعليقات
إرسال تعليق