نعي ايامها

ليلي لسة برد من غيرها
مهما اتقلبوا فصوله
واتبدلوا التواريخ ..

لسة قلبي بيسأل عنها
و اقوله إتعود من غيرها
يبدأ نواح وصريخ ..

فـ انزل تعذيب فيه لحد ما احس انه انتهى ..
واسمع اخر دقة منه خارجة بتلفظ اسمها ..
ويعلن عقلي لحظة وفاة
قلبي مات و البقاء لله .. خلصنا منها ..

ويبدأ نعيي أيامها ينزل في اخباري ..
فراقها تعبني صحيح
مع انه بخطري و قراري ..
هقفل بابي في وش الريح
وافتح شباكي لنهاري ..
معدش ليلها يلزمني
ولو ع البرد عادي يفوت 
وانشف م الوحدة لحد ما أموت
احسن من دفا زايف
مليت اعيش خايف
وادارى في حيطانها
القرب خلاني ادبل
ولقتني واقف بعطلها
اتنين محلك سر
ما عادتش تصلح بر
و من حر وحدتها .. 
ما عرفتش استرها
ايام مكتوبة عشناها وكتر خيرنا
وعودنا مقسومة ويا ناس غيرنا
اكيد الفراف افضل حل
مهما فضلنا نقاوح فيه
و يارتني كنت بعدت قبل 
ما اسمع منها قابلتك ليه ؟


تعليقات