اخرنا اصحاب

ايوة بعدت لاني اتعودت يا اما اكون يا ما كنش
طول عمر اللي لونه رمادي بشوفه عليا مابيلقش
ومش حاكم نفسي ما بين ابيض واسود
انا زي الطير وقت اما افرد جنحاتي
بملى السما الوان
ايوة في بعدك تعبان وما بنكرش
ايوة الحالة في بعدك ماتسرش
لكني اخترت اعيش ميت
ولا اني اموت وانا عايش 
بنده على قلبك مايردش
مليتي الروح والقلب 
لكن يا خسارة قلبك بيا ما حسش

والمرة الوحيدة اللي حن قلب 
وقررتي تريحيني
بقلب حجر صوان
اصدر عقلك فرمان 
وقررتي يامولاتي و من الان 
عنك تبعديني
ما حبتنيش .. ولا كان عمرك هتحبيني 
و صممتي رغم محاولاتي ماتفهمنيش
و شفتيني ابعد ما يكون عن كونا أحباب
رغم اني رضيت بالامر الواقع 
لقيت ايامي في حضنك وقت وضايع
لحظات بتمر ع الفاضي ما بين اتنين اغراب
لقتني متساق عمدا ورا رغباتك
بكدب نفسي ووهم عقلي بقناعاتك
وبحاول فيكي اعدل تفكيري 
وأظبط ظبط مكانتك في ضميري
حاولت كتير لكن وغلاوتك ما قدرتش 
اقتنع نفسي ان احنا اخرنا اصحاب

ولو شيفاني ضعيف فـ مايضرش
شيفاني متهور ماشي ورا قلبه
وراكن عقله اللي ما بيونش تفكير فيكي
اعملك ايه مانا دورت في قلبي على مساحة
تليق بيكي و ما لقتش
اقدمت الاحلام ملك اديكي 
وبدون اي مبرر منك
رجعت مرفوضة و ما اتقبلتش
تصوري لحد النهاردة انا مش عارف
ايه الاشياء النقصاكي وبيا ما كملتش
حسيت ان انا مبدأ مرفوض من بابه
وان ومشاعري وقلبي اتخلقوا اساسا
علشان ينجرحوا ويتسابوا
وان انا عمري ما هسكن لك خاطر
ولا زي هيخطر لك اصلا ع بال 
ايوة بعدت .. ونفسي لحقت
مانا اللي غلطت يوم ما قبلت
العب في حياتك دور تمثال
 
 

تعليقات