شهريارك مل

حكيتك للوجود قصة 
وزدتك من الثناء عطايا ومدح
عشت في حبك كما فارس
و شوفتك بعيني غنايم فتح
عزفتك غنوة على المقسوم
عزفتيني مقام الصبا في نوتة جرح
ويعلم ربي اني ما قصرتش
و حاربت بكل سطوتي فيكي
بقلبي وعقلي في نفس واحد
ولا عمره كان وارد اتخدع فيكي

وف عز الخطة المجنونة
وبرغم النية الملعونة 
وقت الطعنة كنتي حنونة
لدرجة قلبي ما حسش
حاولت اوجدلك عذر 
دورت إنما ما قدرتش 
اعذارك كلها في دماغي اترفضت
و حدوتة قبل النوم خلصت 
شهريارك مل خلاص من حكاويكي
وفات سيف الفراق يجوز فيكي
وحكم عقله يمحيكي من قلبه ومن ذاته
كتبك بندمه اخر سطر في حياته
فقد الكلام معناه وإثباته
و بوخ من كتر ما اتكرر
واللي كان حلو فيكي زمان
ماعدش الان يفرق ولا يغير
طعمك جوا العروق مرر
و ما عدش العتاب نافع 
ولا املك سبب ولا دافع 
يخليني اتحملك واصبر

و ليه اتركك في حياتي
قصة نهايتها مفتوحة
ما هي واضحة زي الشمس 
من اول كان ياما كان
والنية مفضوحة
خلي الحدوتة لصحابها
وفوتي شهريار منك
يعلن التوبة نصوحة

حكاية للاعمى مشروحة
موجب عندك في طموحي بالسالب
بيساوي امل خايب
يعني النتيجة فراق 
لو حتى مش عاجب
وانا جدار عمره ما ينهار
عشان نقص من رصته قالب

احنا كدا لذاذ وتمام
خرجنا بوداع جميل وسلام
ومبسوطين كالعادة

اخر لحظة ليكي جوايا
يوم ما استشهد قلبي في غدرك
و استكبر قلبك يلقنه الشهادة

من لحظتها راح اللي كنتي بتعرفيه
و ندمك من برود دمك ماقدرش يدفيه
خلاص علمتيه يرمي وراه ويبص قدامه
دلوقتي اللي عاش يخدم في رضاكي
بقى حضورك وغيابك خدامه
بقيتي حرامه وذنبه
خسرانك وبيحمد ربه
عشان من كيدك نجاه
ونجاة قلبه في بعدك خلاه .. يفهم و يشوفك صح
يغور حبك ولو في ايده الف حياة
مدام قادر و بكل سهولة يخون العيش والملح

تعليقات