بنوتة عادية
أحـلامـي جـداً بسيطـة .. وعـلى قـد الأيـد ..
و عارفة يقيناً إن الدنيا بتإذي اكتر ما تفيد ..
وإكـمن الـدم السـاري .. في عروقـي عنيـد ..
إختارت بطولي أكمل و أعافر
جوايا بيصرخ ويقول أنا قـادر
انا واحدة قوية .. و من الآخر
مش مخلوقة عشان أتكن وأدارى في حيط ..
عايشاها ثبـات .. وساعـات تنطيط
وحاطة نظام .. بس بدون تخطيط
هدفي محدد .. وطموحي بسيييط
كل المطـلووب .. ( نـاس تفهم )
املي المرغوب .. في قلوب بتراعي ..
انا مش مولودة وحيدة كئيبة
ولا كـره النـاس ورثـاه في طبــاعي ..
بالعكس .. دا حلمي وصبري هما صداعي ..
بشغل بالي بدون داعي
واعمل للعشرة مابينا حساب ..
هما يسدوا في وشي
وانا لرجـوعـهم فايتة البــاب ..
وقول صبرا .. معلشي
رصيدهم باقي وما خلصشي
واديهم في الاول والاخر بردو اصحاب ..
و فضلت اعـدي وأفـوت
وأكتم جوايا الغل وازود
و كتر الضغط دا بيموت .. احلى ما في الـروح ..
وما فيش اصعب من عين
ساترة الدمعة بضحكة سخيفة .. ورافضة تبوح ..
ولو مسموح للماضي يعود
طـفولتي هتشهد .. و يطـول الشرح ..
عن بنت بتتشاقى في خضن الفـرح ..
لحد ما جابوا الجرح لعندي وروني
ان الدنيا مش بابا نويل
مش كل الموجود جوا اللـفة بالشرط جميل ..
وان نهـاري بونسه و نـوره
مربوط في خيوطه .. عفاريت ساكنة الليل ..
وان الضحكة في وشي
مش دايما غرضها نبيل ..
في ناس اوقات تضحكلي
ومن جـواها الغل تقيل ..
وأنا مش واخدة غموضي هـواية وفـن
افعالهم ربت جوايا الشك و سوء الظن
و رغم ذلك .. قدامهم طولة بالي فرشاها طريق
وأكـتم غضبي قبل ما يمسك في هدوئي حريق
وأمنع نفسي قبل ما يخرج رد يسيء
ويزعـل حتى اللـي أذونـي
مش ضعف و خوف من حد
إنما طبع وأهلي عليه ربوني
وياريته نفع أو حق
إكمني سكت و ما قلتش لأ
اداهـم حـق يقـولوا دي قـوية وصلبة و جامـدة ..
حسدوني .. على الدفى في عيـوني ..
ومحدش خدني في حضنه .. وحس إنها باردة ..
اتخدعوا في صمتي و بالغوا في وصفي ..
شافوا سكوتي مصدر قوة
وهـو اساسا نقطة ضعفي ..
مشفوش الروح من جوا
وهي بتنزف و تصفي ..
محدش حس .. محدش قدر
محدش فكر يجي ولو مرة في صفي ..
اسمع واسكت .. يعيبوا سكوتي ..
وارد يقولوا .. بتخطى حـدودي ..
واحدة غريبة .. وعـايشة بمودي ..
ولا شيء فارق أو مـالي عنية
محدش جرب يجي مكاني ويبص عليا
وقالوا دي مغـرورة .. و مكابرة .. وعندية
وانا يعلم ربي إن أنا بنوتة عادية
ممكن كلمة تطمن خوفي
وتفــك العقـد المـربــوطة ..
انا بنت في عمر التلاتين
مشتـاقة لضـمة دراعــين
ونام على صوت الحدوتة ..
#شِعر_في_صورة
#Ramy_kassem
تعليقات
إرسال تعليق