ست البنات اجمع


كل ما اقول الحب فيها خلاص جاب آخره
الاقي القلب يكتب عنها كلام  احلى من قبله
وكل مرة بشوفها   
بحس اني بحب جديد
كأن عيونا كانوا بعيد 
و لأول مرة بيتقابلوا

كلامها معايا بيحي البداية ويعدها 
و بعشق حتى في الصمت تنهيدها
وادوب في كلمة قالتها 
ولو بدون قصد
بحبها كلها على بعض
بصمتها وكلامها
برضاها وخصامها
وضحكة ويا هزارها بتملى الارض

و صوتها يسري في عروقي
كما عشاق بيتغازلوا في ربيع زاهي
عجزت كل المعاني جوايا
عن وصف حسنها الباهي
و تعب الكلام فـ سلم لصمتي فيها الامر
وفات عيني تتغزل
في أم العيون بني .. والجدايل حمر
وكل ما انهي في الغرام سطر 
فجأة يتولد غيره
هي اللي جمالها بيطرح فرح من رحم خيره
دي اللي حضورها تأثيره عليا اكيد
وحالي معاها كل يوم في جديد
من فرحان لمرتاح لمبسوط و سعيد 
دي اللي جت لي كوقفة عيد 
وانا الصايم عن الفرحة بقالي دهر
شبعت و رويت روحي من زادها 
ومليت عروقي من روحها ملو النهر
لا عمري منها في مرة شبعت 
ولا في غرامها بحس بجوع
و كل ما اقول اديني وصلت
تفاجأني بشعور فريد النوع
حبيبتي قصة كدا وموضوع
مايخلصش في قصيدة شعر
الشعر اضعف كتير منها
واخاف يخوني تعبيري 
أو يسهى قلمي فـ يظلمها
دي اللي بحسنها بينكم 
بتعايق واتباهى واتفاخر
دي اللي جمالها م الاخر
و صعب العين تشوف غيرها
حبيبتي ست البنات اجمع
و لو بينكم واحدة تشبهها
فـ ياريت تزعق عشان اسمع








عودين فل وياسمين في ربيعهم الزاهي
على ثغرها الباسم ضحكة و اترسمت 
كل المعاني و الحروف عجزت
عن وصف حسنها الباهي
واحس دقات قلبي كما طفل في ملاهي

والقلب دقاته بتزيد وتتعالى
لو حروف اسمها اتنطقت 



و جدها وهزارها وهما  كما عشاق 
ماشين جوة قلبي بيتغازلوا

تعليقات