للمرة اللي انا نفسي ما عدتش عارف كام
كل ما احاول اكتب عنك مش بلقى كلام
يافرحي الخام
يا نصيبي الطيب م الايام
دا انا مهما عملت و قولت
و مهما فكرت و حاولت
عمري في مرة ما وصلت
لمعنى يوفيكي المقام
دورت في كل لغات الارض
ملقتش المعنى اللي يليق بالظبط
ويوصف روعاتك بإحكام
ولو على الكلام
فياما شعراء قبلي بالالوف
قالوا كلام
من كتر ما اتكرر بقى معروف
وبحس في وصفك اني بقاوح وبعافر
ومهما كتبت بيطلع في الآخر
مجرد حشو كلام و رص حروف
فكرت ان العيب فيا
وان الازمة في ضعف الكلمة
اتاري الحكمة في قوة الموصوف
ياعود انثى وملفوف في الحسن الخام
انا بدي اكتب لك احلى كلام
ماخطرش في بال انسان قبلي وقاله
قلبي قليل الحيلة في وصفك
جاي لعندك يشكي لحسنك حاله
ويشهد إنك وحدك ..
آخر حلم جميل إتبقى له
يا ام عيون نظرتها بتجبر خاطر وتسر
احب اقولك واعلنها في نهاية الأمر
إن مشاعري الحقيقية تجاهك
مكبوتة ولسة ما خرجتش
في كلام احلى كتير علشانك
متشال جوايا و ما تقالش
و كل اللي انا قولته في حبك
دا اقل كتير اوي من حقك
بالنسبة لقيمتك وغلاوتك
مهما عقول مابينصفش
يا اللي عنيا تشوفك ما بترمش
خوفا لتفوت منك لقطة
يا مرة في عمر ما تتكررش
لا وكمان لايقة و ظابطة
من يوم حبيتك و قلبي في ورطة
وعنيا اتسحرت بجمالك
شاوري على النجمة هجيبهالك
وابنيلك من شِعري بيت جواه تتدفي
انا جني بنفز احلامك
ورضاكي طريق مرسوم على كفي
بس انتي اهدي عليا ياحلوة
ياحلوة وبزيادة دلال
ياللي بيعزف قلبي حروف اسمك
كأنه ربابة في إيد متقال
ياللي جمالك نفس جمال الشمس
وهي بتطلع ع الصبح تبان ..
شايف كل بنات جنسك نفس اللون
وشايفك وحدك كل الألوان ..
ياللي انتي اليوم وياكي
بعمر مما يعدون
يا أمر الحب من ربي
بقدرة الكاف والنون
ياللي غلبتي بحسنك ليلي
وحولتي بعشقك عقلي لمجنون
يا عشق خارج حدود المنطق
وحق بين مافهش ظنون
ولا تارك مجال للشك
قلبي بابه عليكي اتسك
فلا داخل ولا طالع
قابلتك شبع قلبي وبطل عك
و ما عدتش في اي شيء طامع
من يوم شافك قلبي وحالة تمام
وكل الخير بيحصل له
سبحان من جعلك في حياتي امام
وأيامي وراكي بيصلوا
قلبي مسلم
الكلام واصل لملكة الاحساس
الاولى في قلبي والاخيرة خلاص
تعليقات
إرسال تعليق