البنت الحيلة

نص البنت الحيلة 
تأليف :رامي عبده قاسم علي
 

البيت سهران قلقان والكل مهموم
 لسة لحد الان البنت الحيلة مارجعتش .. 
 
بعد مالفوا ع كعوبهم طول اليوم
راجعين من غيرها مش لاقينها والحال مايطمنش

البيت لو لمست ارضه الابرة ترن
ضرب الاخماس في اسداس 
جوا الراس عمال بيزن
الوضع العام مش تمام .. النايم قام ..
والصاحي من قلقه وخوفه خصمت عينه النوم
تفوت مواعيد .. الحيرة تزيد
لحد مايكسر صمت البيت رنة تليفون مشؤوم

يرد ابوها بصوت مرعوش مكتوم
بتقول إيه.. أيوة انا
بيقولوا تعالى بسرعة الحق 
بنتك محجوزة هنا 
موجودة من بدري عندنا 
في عنبر طوارئ مستشفى السموم

وهب يطب الاب يقع من طوله
والام بتبكي ومش لاقية كلام لأخواتها تقوله
يسكت حبة ويبدأ يتخيل
والوضع خطير والوقت قليل
وشغله الشاغل دلوقتي 
ازاي يلحق قضى قبل حصوله

ينزل يجري ودقات قلبه على هناك سبقاه
عايز يلحق بنته بسرعة
واخد من الخضة ٢٠٠ جرعة
مش شايف خطوة لقدامه يا حول الله 
وفي الاخر يوصل بعد ما يسأل خلق كتير
يدخل ويلاقي ضناه قدامه 
مفرودة وخلصانة ع سرير
و كل ما ييسأل بلطو معدي
يقوله ادعيلها الوضع خطر

بصدمة وحسرة يبصيلها
يوطي يبوس ايدها ويدعيلها 
يارب اشفيها ..  الطف بيا وبيها
يارب خد بإديها وتقوم منها على خير

سمعت صوته بينده ربه حست براحة و امان
فاقت على دايرة حب محوطاها
اهل واصحاب وجيران
الكل مدمع قلقان  
وتدور بعنيها فتلاقي ابوها
واخدها في حضنه وزعلان
ايه في الدنيا دي يستاهل
توجعي قلبي عليكي
وتخذلي ربك فيكي 
وتسلمي أمرك لشيطان

وفي عز ما احساس الضعف ماليها
و عيون حبايبها بتعاتب فيها
بتقوم وتحاول تسند طولها
فتلاقي ايادي كتير اتمدولها
بالحب عشان تتعكز بيها

فـ تشوف في عنيهم غلاوتها
وتصدق فعلا إن دنيتها
فيها حاجات تستاهل تتعاش 
وخسارة تضيع ورد شبابها
علشان حاجة رخيصة ماتسواش
اخيرا بدأت توعى وتفهم 
و تفوت عقلها يخرج من الانعاش

شافت بعنيها قصادها طريقها
رجعت تعلن للدنيا وجودها
وقدرت بعزيمة تعدي الصعب
تجربة قاسية صحيح لكن قوتها
بعد ما رجعت م الموت كسبانة الحرب
 
ومفعول اليأس ابتدى يفصل
شافت جواها بنت قوية
مش مخلوقة عشان تفشل

خرجت م الازمة بنت جديدة
قلبت من ضعف لقوة شديدة
الدنيا بحالها ما تقدرهاش  

دي حكاية بنت بريئة 
مع عيل بايظ مترباش
حاول انه في يوم يإذيها
واللي ابوها صحيح تعبان فيها
عيل تافه مايكسرهاش

نص البنت الحيلة 
تأليف :رامي عبده قاسم علي
 



تعليقات