حب مع ايقاف التنفيذ
عشق كل مادى يزيد
سكة كل ما اخلصها
ارجع اعيدها من جديد
لا وصلت مكان مااتمنيت
لا من قريب ولا من بعيد
متعلق من عشمي بالمقلوب
طمعا في لم قلوب
فراقها شيء أكيد
قبلت اكون لك صاحب يتحب
او حبيب يدوب اخره يتصاحب
وبأكتر من كدا عقلك مش حابب ولا قابل
عشانك قبلت بوضع مايقبلهوش عاقل
قبلت اكون لك صاحب
عمره ما هيطلع جنبك في الصورة عريس
قبلت اكونلك حبيب وشريك عمر بدون تنفيذ
حاولت اكون معاكي حريص
في كلامي وردودي وانتي قصادي
ودي اول مرة أنجرح واكون راضي يكفي انك مريتي في عمري
وحليتي ايامامه
يكفي انك زورتيني وعلمتيني
العشق وهيامه
ومش هنسى يوم ما شافك قلبي قدامه
فدبت جواه الروح
كان قبلك كافر بالحب
وع ايدك عشقه الممنوع اتحول مسموح
و بطلوع الروح قلت موافق اكون لك صاحب
خوف من اني اخسر قربك وانا مش حابب
على ايدك شفت في نفسي عجايب
وحاجات عني كنت انا ما اعرفهاش
طول عمري وانا متعود
اقفل مواضيعي ومركنهاش
وعندك بقيت محلك سر
ومش فاهم بجد ايه السر
وليه قدامك تايه
ورافض اخد رد فعل
ومعلق نفسي بامل خسران
وعشم غلطان وتوهة وضياع وتوهان
بقيت انسان تاني ما اعرفهوش
قبلك ياما دخلو وغدرو وشوش
ماعادى انتي شبطانة في قلبي
زي ما تكوني مسمار ودقه شكوش
لا قادر اقرب ولا عارف احوش طيفك من بالي
ومكمل وياكي رغم ان انا عارف ايامك مش بقيالي
وبغضب من ناس دعيالي يعوضني بخير
مش قابل دعوة بغيرك لو حتى براحة بال رجعالي
وصلت في حبك لحالة غريبة
كلي بيقدر ويعاملك صاحبة
ومافيش غير قلبي اللي مصمم ان انتي حبيبة
و يادي الخيبة هفضل متشعبط في الوهم وراضي
تايهة وبدور ع الحل مع انه قصادي
لكني هموت .. لجل ارتاح لازم افوت
و افتح شباكي على بكرة بدونك
واعيش الدنيا بألوانها ناقص لونك
وابعد عنك وانا عايش بيكي
واريح نفسك مني
واريح مني حنيني
عمر ما كنتي هتبقيلي
طول عمرك ليلي وانا نهارك
ولقانا مكنش بمقدارك
وطريقك رافض توصيلي
بصي لقدامك في رحيلك
واوعي في مرة تبصيلي
بتعذب أصلا في رحيلي
وبودع اخر ايامك
مستنى اللي تجيلي تكمل
من اخر خطوة لأقدامك
وان ماقلقتش خطاوي بتشبهلك
فانا هثبت وحدي في مكانك
هتعب وهيتعب والتعب مكتوب
عاللي طمع في شيء عمره مكان ليه
هنساه بالعافية وهنسيه
هقسى عليا كمان عليه
وهو كله لمصلحته
خليه عيشها براحته
ولو عليا انا مرتاح
عشان من ذنبي ريحته
بكرة يجيله اللي يواسي في ليله
وينسيه ايامي
وانا اكمل بكرة وانا مستني
حد بكمل من اخر خطوة وقف وسبهالي
تعليقات
إرسال تعليق