قبل الفراق بساعات

قبل الفراق بساعات
حبيت اكتبلك نص يليق بست البنات
مشكورة ع الايام الحلوة 
ع الاحساس الدافي
وقبل رحيلك احب اقولك
ان صوابعك لسة علامها ع كتافي
وان انا حاسس دلوقتي بقلبي 
ع نار بعدك ماشي وحافي
وانك بعد ما مني سلبتي
تصبح ع خير
ازاي ممكن تاني ابات دافي

وكلامي ان بان لك عتاب او لوم
فـ بحق الله دا اقراري واعترافي
بأنك نورتي وشرفتي واهلا
و بإن مرورك كان فعلا
وفى وكان اكتر من كافي

فاكرة زمان يوم قولت انا حبيتك
دلوقتي انا جاي لك قبل رحيلك
بستأذن منك اسحب كافي
لجل ما ترجع انا حبيتك 
للمعنى الاصلي الوافي
انا حبيت 
وحسيت في حاجات طلعت اصلا مش فيكي
اتمنيتك حضن وبيت 
وما دوقتش طعم الغربة غير في عنيكي 
شوفتك نعمة وحبيت التوبة
امنت اني حبيبك وانك محبوبة
اتاري مذاهب حبك كات معيوبة
وبعلن كفري انا بالحب على اديكي


تعليقات