مش فارقة ف بوكس صغير ولا كبير
مش شرط تجيب فيلا وعربية او سولتير
كيس شبسي من ابو خمسة
مع ضحكة جميلة ونظرة و همسة
صدقني هتفرق معاها كتير
أصلها بالقيمة مش بالكم
حسسها انك دايما مهتم
هن حيث الشبع ساكن
عنيهم مليانة لكن
لا بيحبوا بخيل ولا تقيل الدم
افرد وشك ما تبوزش
اسمع منها وما تقفش
لو مش ليك تحكي
في وقت الزعلة سيب الباب متوارب وما تقفلش
خلي ف بالك اخر زعلة لجل ما تتكررش
عيب ع الراجل يقول ويرجع فيها
ولو زنقت خالص قول اسف وما تفكرش
اوعى يفاجأك منها سؤال وتبلم
ونصيحة فكر 100 مرة قبل ما تتكلم
اوعى تحاول تكدب دول ف الكدب أساتذة
ربنا يكفيك شر الحاسة السادسة
عارفين معنى الكدب
فاهمين الجد م اللعب
حل اللغز له طريقة
وكلمة السر هي الأسلوب
البنت بطبعها رقيقة
عمرك شفت وردة بتتحدف بالطوب
كون لها بلسم هتكون لالمك أقوى مسكن
ولو ف بينكم جايز هيصبح ممكن
اسمع نصيحتي واعمل بيها
اضمنلك زفة وكوشة ومأذون
تعليقات
إرسال تعليق