ت

فرصة سعيدة

ع حطة ايدك زي ما سبتيني
مستني اللحظة اللي تحني
وتحت جناحك تخديني

واديني اتأدبت
فهمت و اتعلمت ان بعدك ورطة
وبأدب نفسي بقسوة  ع الغلطة
وزي ما ف البعد ايدك فرطة
فكيها شوية وسامحيني

دا انا كلي ملكك
ورهن اشارة من صابعك
كلمة حاضر ردي الثابت ع امرك
متشعبط أملي ف ديل ظلك
وغلاوة امك رديني

مش دول الكلمتين اللي غرورك
بيحارب لجل ما يسمعهم
اديني هرد عليكي بأسلوبك
ومشاعري ماعدتش همنعهم

مضطر و مع بالغ اسفي
اقولهالك بالمعنى الحرفي
صوابعي الخمسة اللي في كفي 
انا بحني لغرورك اوسطهم

دا اللي يليق بيكي وتستهليه
لكن هقول ايه
البعيدة باردة
شوكة ف وردة
رويتها بحب و جرحت إيدي
كنتي السم اللي بيكوي وريدي
فكرتك عيدي اتاريكي النكسة
حسبتك نصرة طلعتي الوكسة

رميت طوبتك اتردت ف ازازي
وازاي شوفتك طموحي وانجازي
وفكرتك حل لاسألتي
اتاريكي اصعب الغازي

براكي بيحاول يستر جواكي
تباني لوحدك بس شيطانك مداري وراكي
محترفة كدب عديمة اب
وابليس رباكي

ياخاينة  يا فاكرة
اني ضعت ف غيابك
عندي أخبار وحشة علشانك
بالنسبة لنسيانك
دي أسهل مرحلة عدتها
اللي تعبني بجد وأنا بمحي آثار الهد
وبلم كراكيبك
حلوك ومرك
بكل تفاصيلك
وبطول دراعي رمتها

انتي دور قمار لعبته ف لحظة طيش و خسرته
امتحاني اللي ذاكرته و قفلته وبردو سقطته
لا ليكي لون ولا ريحة
فكرتك ماية بتروي طلعتي سبرتو

كان طبيعي جدا فيكي اتغش
فكرتك صلبة طلعتي القش
زرعت الشجرة وبنيتلك عش
وف الآخر طرتي و سبتيني
فاكرة سنيني
حبيتك بعتيني
ما بينا ايام مليانة كلام
ف صعب بكدبة ترديني

لو روحي متعلقة بوجودك
ايدك ابوسها وفارقيني

ولو انتي الحسنة اللي هتشفع
ف ميزان أعمالي وتنجيني

انا عندي اموت اكرملي
من اني اسمحلك واشوفك
للمرة التانية بتشتغليني

فكراني ايه !!
شيفاني ازاي ؟؟
حمار بلجام ولا فرد حمام مأواه كفوفك
و لااكمني بحبك هرمي كرامتي ع رفوفك
مش انتي السكة اللي توصل
ولا انتي الكعبة اللي هطوفك

محسوبك كرامته بالدنيا
و تاج فوق راسك
ولولا عندي بنات زيك
مكنتيش هتنولي خلاصك
لو واحد تاني
كنتي هتتزلي وتتهاني
ولو انتي مكاني
مكنتش هتسمحي
بس انا سيبتك
تدوبي ف خيبتك
ومعدتيش لزماني

وجودك ف حياتي كان لحن صوته نشاذ
كدبك تؤم صدقك والفرق ما بينهم اعجاز

كدبك ولع في جنايني
وبدال ما تحوشي النار عني
راجعة تطفيها وايدك غرقانة ف جاز

طول عمرك وش اذية
طلعتي الوحش المدفون فيا
كرهي وسخطي  وغضبي
جبتيلي الضغط و العصبي
بعد ما كنت برنس الحنية

ولو عليا وعكس قانون الجرح
كان نفسي اديكي فرصة تانية
مش عشان طيب وسامحتك لااا
عشان اخلص بطاري واهدى شوية

لكن قلبي اكمنه نضيف
وما اتعودش يأذي ضعيف
فرصة سعيدة ووقت لطيف
روحي لحالك
ليلك حالك
وأنا عايز واحدة تنورني
واحدة تشوفني نجوم ليلها
واحدة تقدر تحس و تفكر
ف شعور غيرها
مش واحدة بعد ما هدتني
رجعالي وعيزاني ابنيلها
واحدة ضميرها يخوف
فلصو و براها مزيف
وجواها اسود من ليلها

.............................

تعليقات