ه

بعقل طفل صغير
بيدور على شيء بيحبه
ضايع منه وعمال بيزن

باستهتار عيل طايش
كنت مقضيها وعايش
كل يومين مشهد من فيلم
يوم احب
ويوم اجرح
واربي حمام
مش حبا فيه
عشان ناوي ادبح

كطفل مدلل
عشت اغلط واعمل
كل الأخطاء
ياما خسرت وكسرت
قلوب حبتني
بكل غباء

مفيش لعبة ملعبتهاش
ما فيش غلطة معملتهاش
مشيت بطيشي ما بحسبهاش
لا عمري فهمت
ولا مرة ندمت
على خسارتي
اشمعني انتي
اللي فرقتي معايا وغيرتي

مع انك عادية ... وابسط كمان م العادي
الغلطة معاكي المرادي كانت بحساب
بعدت وفاكر اني السايب
اتاريني لندمي ف بعدك متساب

انا وليلي وندمي عليكي
بقينا أصحاب
بعدك أصبح حالي يحير
قلبي الطايش عقل واتغير
كبر الطفل اللي عرفته صغير
حالة اتبدل ووصلت أحلامه
لسكة سراب

فتيني خراب وبدال ماتربي غروري 
اختارتي السكة السهلة وفتيني
بتقولي طلعت غير ما حسبتيني
انا ما كدبتش
وما قلتش اني ملاك بجناح
انتي ساعتها عرفتيني
زي الطير بتنقل من غصن ليمون
لشجرة تفاح
وان كنت زي ما بتقولي
مليتي من عيني الزايغة
ونسيتي ايام مافضلتي تحومي
وتلفي سمايا تايهة ودايخة

و بعد مابحبالك علقتيني
خلصت حكايتنا في زرتك
وانك يوم جربتيني

في البعد خلاص مرتاحة ومش شاغلك
سيباني لوحدي احل ف عقدك ومشاكلك
رحتك صورتك
صوتك شكلك
سيباهم ليه بيحوطوني
قلبي المشتاق اللي يومياتي بيندهلك
ويقول ايامك وحشوني

ندمي وأسفي اللي هروني
نسيتي زمان وشوقك لعيوني
نسيتي الزن وكلام الليل
نسيتي الحضن وقعدة نيل
ونجوم قايدة تنورنا
نسيتي نص تشاهد ف رقبتك
جبته هدية
دمعتي شوية وبعدين هزرنا
انا ما نستش
ومش ناوي انسى
انا تايه في بحور الوحدة
كمركب عايمة بلا مرسى

تايه لا انا عارف اسيبك
ولا عارف لرضاكي سبيل
و مش لاقي بديل يسرق طيفك من تفكيري
بصالح نفسي ع فكرة
انك كارهة في سمايا تطيري

لا هي اول ولا اخر غلطة
مش اول واحد في الكون يغلط
عشان تفوتيني كشيخ سكران
ماشي بيدن في شوارع ملطة
وأم بروحك ما تصليش
وادعيلك شياطينك تتنطط

بقيتي خلاص كفرانة بحبي
رافضة السعي في دربي
حتى ولو آخره الجنة
شايفة الضلة في قربي جهنم
ووجودي في رحابك لعنة 

ليه استكترتي التوبة عليا
ليه قفلتي في وشي بيبان الود
ورفضة سماع تبرير او رد
سبيني ادافع عن نفسي
سبيني اوصفلك معاناتي
احكيلك واشكيلك
من سوء ظنك
من قلة تقديرك لظروفي
لو تدي الفرصة لنفسك
تفتحي شباكك وتشوفي

غروري وهو بيترجى
وعندي بيتأسف لكرمتك
على ذنبي وتقصيري وجرحي
بتوضى بدمعي
واسجد وادعي ربنا يهديكي وتسامحي

بترجى وكلي يقين عشمان ف سماح
تقولي مسامحة ولو بالكدب عشان ارتاح
وامد اليد براية صلح
ترديها عليا سهام وارماح

ومن فرط القسوة اللي ف قلبك
شيفاني براقبك من ركني
بتقولي كفايه عليه يتمنى
يلمح طرفي ولا يطلني

وسيباني اسرق لحظة
قدمت منك رمتيها
وأنا ماشي الملم ورا منك
في حاجات من ريحتك اعيش بيها

فتشي جواكي

نهاري فايت حقه ليلي يتسلى بروحي
حالي بيعزم عزالي ليلاتي ع جروحي
وقلبك واقف يتفرج ساكت
فرحان بهزيمتي

اتاريني مش وحدي اتغيرت
انتي كمان اتبدلتي
غيرتي في جلد برائتك واتحولتي
لناشفة وقاسية
و فهمة انك كدا عاقلة وراسية
وعارفة مصلحتك
طب يا ستي اديني ريحتك
ولو ع ندمي هندم بيني وبين حالي
أدام استخسرتي لحظة راحة تنوليهالي

فعادي و مشكورة
هتضلك جوايا كصورة
كل ما احن أبصلها
والوم قلبي الجاحد انه خسرها
وتضل مشاعري بعيد عنك
غريبة وتايهة ومحظورة

بقولهالك وانا متأكد
مهما بعدتي ومنين ماتكوني
هيفضل جواكي حنين ليا
ومهما دريتي وانكرتي
فضحاكي رسايلك
وسؤالك ع الأحوال
لناس شاهدة علينا
قلولك بالخير سيرتك
دايما بيجيبها ف وسطينا  
وانك دايما ع البال

ولو ذنبي ملوش عندك غفران
ف انا شاكر جدا افضالك
شاكر انكارك واستهتارك بمشاعري
وندمان زيك على يوم ما نصيبنا جمعنا
وخلانا سطور في رواية ملهاش مغزى ولا معنى
بداية نهيناها بفرقة
ونهاية بدأناها بوجعنا 

















بسأل واقول اشمعنى
اشمعنى انتي اللي ما قدرتش
امحيكي م الذكرى
وبعدك محنة
انا اللي عشت كطفل مدلل
من حقي اغلط  واعمل
كل الأخطاء
ياماكسرت وخسرت
قلوب غالية بكل غباء

تعليقات